Khliehriat, Nailar 12
Ka surokbah National Highway-6 hapoh East Jaiñtia Hills District ka la nang sniew shuh shuh katba nangmih ki sngi ki por bad mynta la kynnoh ba dei na ka jingslap lynter kaba la pyntwa ïa ki lum, ki dieng bad rong ïa ki maw ha ka jingïaid lynti jong ka um.
Na ka daw jong ka jingslap jur ha ka miet jong ka Sngi U Blei, ka jingtwa jong ka khyndew bad ki mawbah ka la jia biang ha step Lah Sngi U Blei bad kaba la wanrah ïa ka jingdheng kali kaba jur.
Haba shimkhia ïa ka jinglong-jingman jong kane ka surok bah, ka MLA jong ka Sutnga-Saipung Constituency ka Kong Santa Mary Shylla ha ka 12 tarik Nailar ka la hiar sha ka shnong Kuliang ban jurip ïa ka jingtwa khyndew bad ban lum jingkheiñ ïa ka jinglong jingman kumjuh ban wad ki lad ki lynti ban weng ïa ka jingeh kaba ju jia ha kane ka jaka man ka por.
Ha kane ka jingjurip la ïadonlang u Deputy Commissioner ka East Jaiñtia Hills u Shivansh Awasthi, IAS bad u SP ka district u Giri Prasad, IPS, Project Director ka NHAI bad kiwei kiwei.
Ka Kong Santa Mary Shylla ka la ong, ka jinglong jingman jong ka surok NH-6 ha East Jaiñtia khamtam na Lumshnong haduh Malidor ka long kaba sniew haduh katta katta bad ki paidbah ki don ka nongrim ban kynthoh ïa ka NHAI bad ïa ka Sorkar Jylla hynrei ka long ruh kaba donkam ban sngewnguh ïa ka Sorkar bad ka NHAI namar ki la leh ïa kaba donkam ha kaba ïadei ban pyndep ïa ka jingmaramot ïa kane ka surok. Wat la katta, ka la ong ba ka don ka jingeh kaba khraw namar ka jinglong ka suiñbneng kaba la pynlong ïa ka jingsangeh treikam.
Nalorkata, ka la ïathuh ba la bthah ïa ka NHAI ba kan shim ïa ki lad ki lynti kiba biang ban peit bad ban pyndap ïa ki thliew ki syar ha shilynter ka surok bah bad ban pynkhuid ïa ki nala um ban lait na ka jingjulor shuh shuh bad ruh ban pynthikna ba ki kam kin dep noh kloi.
“Nga sngewthuh ïa ka jingeh kaba khraw kaba la wanrah ïa ki paidbah namar kane ka jingtwa khyndew kaba ju jia man ka por hynrei nga kyrmen ba ka jinglong ka suiñbneng kan ailad ïa ka NHAI ban treikam”, la ong ka Kong Santa.
