Tura, Nailar:
U MDC ka Tura, u Bernard Marak, u la kam ba ka jingkiew jong ki ‘Bill’ ha ka bai bording, wat na bynta ki longïing kiba hap ha ka thup BPL, ka la buh jingeh shi kat dei ha ka jingim ki nongshong shnong jong ki jaka nongkyndong ka Ri-lum Garo.
“Ka skhim Saubhagya jong ka Sorkar Pdeng kaba ngi tip kum ka ‘BPL Line’ ka thmu ban pynbiang bording sha ki longïing ba duna ka ïoh ka kot ha ki jaka nongkyndong. Hynrei kane ka la kylla long pynban ka jingban khia ïa ki nongkyndong namar ka jingkiew dor ha ka bai bording kaba la ktah shibun ïa ki,” la ong u Bernard ha ka kyrwoh khubor.
U Vice-President ka BJP u la bynrap ba ki ‘Bill’ mynta ki la kylla long ka rukom ban dawa pisa na u duk u suk.
“Wat ïa ki ‘Smart Metre’ la pyndait khlem da ïoh jingbit na ki nongshong shnong. Kito kiba la pyndait ïa ki ‘Smart Metre’ – ki bym treikam bha barabor, hadien ki ïoh ïa ki ‘Bill’ kiba heh. Ki hap ban siew sha ki naba ym don jingïarap kaba wan na ka ophis wat hapdeng jong ki jingujor,” u la ong.
U Bernard u la ong ruh ba ka Sorkar BJP ka la pynbiang ïa ka jingpynïasoh ‘Metre’ ei sha baroh, wat la katta, ki don bun bah ki jingbym biang kiba la mih ha ki jaka nongkyndong.
“Ki ‘riewlum kim donkam siew khajna hapoh Meghalaya, hynrei la pyntreikam ïa ki khajna ha kawei ka rukom (indirect taxes) da kaba ai daw halor ka jingpynbiang ïa ki jingshakri ha ka liang ka bording, ‘mobile’ nalor kiwei-kiwei,” u la ong.
“Ka Sorkar Pdeng ka la mang pisa na bynta ban pynïasoh bording ha ki jaka nongkyndong na bynta u duk u suk, hynrei u duk u suk u kylla long lanot ha ki tnad treikam. Ka rukom pynkiew bai bording sha ki longïing ba duna ka ïoh ka kot, i kumba ka dei ka jingshim kabu ba pura bad ka jinglute na ki ‘riewlum ba shida ha ka rukom pyrkhat,” la kynnoh u Bernard.
Utei u MDC ka Tura u la kynnoh ba katto-katne ki longïing ki ïoh pdiang ïa ki ‘Bill’ wat la ym shym la don bording ha ki ïing ki sem jong ki.
“Ha katto-katne ki shnong, ki longïing ki ïoh pdiang ïa ki ‘Bill’ kiba heh khlem ka jingpynïasoh bording bad ha katto-katne, ym shym la don bording na bynta shi bnai hynrei watla katta, ki ‘Bill’ ki kiew. Katto-katne ki ‘riew kynthei ki la ud ba ki ïoh pdiang ïa ki ‘Bill’ kiba kot sha ka T.3,500 haduh T.5,000 ha ka shi bnai. Ka Sorkar Jylla ka dei ban pynsangeh ïa kane ka jing-oh dor heh na kiba duna ka ïoh ka kot ha ka dur jong ki ‘Bill’. Ki nongshong shnong bapli ki pyndonkam bording kum ka jingdonkam ym ba ki ‘riewspah,” u la bynrap.
