Shillong, Nailar 12
U MP ka Voice of the People Party (VPP) na Shillong Parliamentary konstitwensi, Dr. Ricky A.J. Syngkon u la phah shithi sha u Myntri ka tnad ka koit ka khiah ka Sorkar Pdeng, u J.P. Nadda ban kyrpad shimkhia lem halor ki mat bapher-bapher haba ïadei bad ka North Eastern Indira Gandhi Regional Institute of Health & Medical Sciences (NEIGRIHMS).
Haba kdew ba ka NEIGRIHMS Staff Association (NSA) ka la thoh na bynta ban pyrkhat halor ka Cadre Review Structure (CRS) haba ïadei bad ki kam bapher-bapher (bym hikai) ha kane ka shlem sumar, u MP u la kyrpad na u Myntri ban pyndap ïa ki kam ha ki kyrdan ba halor ha NEIGRIHMS lyngba ka Central Staffing Scheme (CSS) bad ban pynkhie im biang ïa ki kam ba la pyndam.
“Ki tyrsok ha ki ‘Ward’ bapher-bapher khamtam ha ki ‘General Ward’ ha NEIGRIHMS, Shillong ki donkam ban bujli mardor naba bun tylli na ki kim long shuh bad ki la buh jingeh shi kat dei ïa ki nongpang ba duna ka ïoh ka kot,” la ong u Dr. Syngkon ha ka shithi sha u Myntri.
Haba pynsngew ba ka um ha ki jaka leit bar bad kamra sum kim biang 24 kynta, u la ong ba kane ka jingbym biang um ha kawei ka liang ka lah ban ïalam pat sha kiwei-kiwei ki jingeh ha ka liang ka khuid ka suba na bynta ki nongpang.
Ha kajuh ka por, u la kyrpad pynbiang ïa ki jingdonkam sha ki nongap kum ki jaka thet-kti, jaka leit bar bad jaka bam (ha ka dor kaba duna) naba bun na kine ki nongap ki wan na ki jaka nongkyndong ba jngai jong ka Jylla bad na shabar Jylla kumjuh.
Nalor kane, u MP u la kyrpad na u Myntri ban pyndap noh kloi ïa ki kam bapher-bapher kiba sah thylli ha ki tnad treikam bapher-bapher ha NEIGRIHMS.
Ha kawei ka liang u MP u la pynpaw ka jingsngewnguh ïa ka tnad ka koit ka khiah ka Sorkar Pdeng kaba la tyrwa ban pynbna ïa ka NEIGRIHMS kum ka Institute of National Importance (INI) bad ka jingtyrwa ban wanrah ïa ka ‘Bill’ ba la tip kum ka ‘Heath Institutions of National Importance Bill, 2023’.
Haba kyrpad ïa ka jingkyrshan na u Myntri ban wanrah noh kloi ïa katei ka ‘Bill’ hapoh ïingdorbar, u la ong ba kane ka ‘Bill’ ka long kaba donkam ïa ki nongshong shnong ka Thaiñ Shatei Lam Mihngi bad ban khmih ïa bun bah ki mat bad ki jingeh kiba ka NEIGRIHMS ka ïakynduh.
“Da kaba wanrah ïa kane, phin pyni ïa ka jingshimkhia jong phi haba ïadei bad ki thong bad jingïohi jngai jong ka National Health Policy kaba khmih ban pyntikna ïa ka jingshakri ka bym shah liang, kaba bit dor bad ka jingsumar kaba paka ha ka liang ka koit ka khiah,” u la ong.
U MP haba kdew ïa katto-katne ki jingeh ka NEIGRIHMS khamtam ka jingbym don ka jinglaitluid bad ka jingshaniah kaba shaba palat ha ka Sorkar Pdeng na bynta ka jingshim rai, u la ong ba kane ka buh jingeh pat haba phai sha ki jingdonkam ha ka liang ka koit ka khiah hapoh ka thaiñ ha ka rukom kaba paka.
“Ka jingmang pisa duna ka ktah ïa ki kam wad jingtip, jingsumar nongpang, ka roi ka kiew ha ki kam tei jingtei, bad ka jingthung kam ïa ki briew ba tbit nalor ka jingpynneh slem ïa ki doktor. Ka jingduna ha ka liang ki nongtrei ba la pyntbit kyrpang kum ki doktor, nos bad ki ‘technician’ ka ktah ïa ka rukom sumar ba paka kaba dei ban pynbiang,” u la ong da kaba bynrap ba ka jingduna ki tiar ki tar ha kane ka jaka sumar ka ïalam sha ka jingslem ha ka ban pynithuh ïa ka jingpang kumjuh ka jingsumar.
Shuh shuh u la ong, “Ki jingpynïaid kam ba kyllaiñ ha kane ka jingtreikam ba mynta ka ïalam sha ka jingslem ha ka jingshim rai bad buh jingeh ïa kane ka shlem jingsumar ha ka rukom pynïaid bad jingduna ha ka liang ki jingtei.”
