Shillong, Nailar 12
U Myntri Rangbah ka Jylla, u Conrad K. Sangma u la ong ba ka Sorkar Pdeng ka la kren shai ba kan ym shah ïano-ïano ruh na shiliang Bangladesh ban wan rung shapoh India.
U Sangma u la ong ïa kane hadien ka jingïakynduh bad u Myntri ka tnad kam pohïing ka Sorkar Pdeng, u Amit Shah ha ka Lah Sngi U Blei ha ryngkat ka jingsynran lang u Symbud Myntri Rangbah ka Jylla, Bah Prestone Tynsong.
“Mynta ka sngi, u Symbud Myntri Rang-bah ka Jylla lem bad ma nga, ngi la shong ïa ka jingïalang khmih bniah bad u Myntri ka tnad kam pohïing ka Sorkar India, u Amit Shah ban khmih bniah ïa ka jinglong-jingman ha ki jaka khappud da kaba buh jingmut ïa ka jinglong-jingman kaba ka Bangladesh ka mad mynta,” la ong u Sangma.
U la ong ruh ba ha katei ka jingïalang khmih bniah, u la batai sha u Myntri ka tnad kam pohïing ba ka jingtreikam na ka liang ka BSF bad ka tnad shipai ka ri ka long kaba ïaid beit ïaid ryntih ha ryngkat ka jingpeitngor kaba pyrkhing na ka liang jong ki.
“Ha kajuh ka por, ki pulit ka Jylla ruh ki long kiba peitngor,” u la ong.
U Myntri Rangbah u la ong ba u la pynsngew ruh sha u Shah ba ka Sorkar Jylla ka la pyntreikam da ka korphiw miet ha shi lynter khappud ban nang pynkhlaiñ shuh-shuh ïa ki bor ïada ha kitei ki thaiñ.
U Sangma u la ong ba u la pynkynmaw biang sha u Myntri ba ym dei ban shah satia ha kum kane ka por ïano-ïano ban jam sha shiliang namar kane ka kam ka long kaba eh ha kaba ka la don ruh ka jingïamir jingmut kaba bniah halor kane ka bynta.
“U Myntri ha ka jingïalang u la ong ba ka Sorkar India kan ym shah ïano-ïano ban jam sha shiliang bad la shim ïa baroh ki sienjam ban pyntikna ïa ka jingïada jong ki khappud khnang ba kan ym don kano-kano ka ïaid ka ïeng ha ki khappud,” u la ong.
Shuh shuh u la bynrap ba ka Sorkar Jylla ka la kyrpad ïa ka Sorkar India lyngba u Myntri ka tnad kam pohïing ban pynbiang shuh ki bor pahara ha shi lynter khappud (lada donkam) – ban pynkhlaiñ shuh-shuh ïa ka jingïada ha kaba u Myntri ka tnad kam pohïing u la ong ba un sa khmih bniah ïa ka jinglong-jingman bad leh ïa kaba donkam.
