Ha kine ki sngi, u Myntri Rangbah ka Assam, u Himanta Biswa Sarma, u la mih paidbah ban khyrwit ïa ka University of Science and Technology (USTM) kaba don ha 9 Mer, Baridua jong ka jylla Meghalaya bad marjan bad ka sor Guwahati hadien ba ka jinghap slap ha ka Lah Sngi U Blei jong ka taïew ba la lah ka la pynshlei um bad wanrah ïa ka jingsyrtok ïa ki nongleit nongwan ha Guwahati. Katkum ka jingkren jong u Myntri Rangbah, hana ka USTM ka la leh syndon da kata ka ‘Flood Jihad’. Nalorkata, u la kdew ba ka jingpynmadan ïa ki lum bad jingpom ïa ki dieng ha Jorabat, kaba dang hap sha Meghalaya, ka la nang pynjubor ïa ki jingeh ha ka por slap na ka bynta ka sor Guwahati.
Ha ka sien banyngkong ba ki paidbah ki la ïohsngew ïa ka jingpyndonkam ïa ka kyntien ‘Flood Jihad’ bad kata ruh kaba mih na ka shyntur jong u briew uba shong ha ka shuki Myntri Rangbah. Baroh ki tip ba u trai bad u Chancellor jong ka USTM u dei u Muslim, bad namarkata, ka jingpyndonkam ïa ka kyntien ‘Flood Jihad’ ka thew beit sha u. Lehse lada dei u Hindu ne u Khristan ne u briew uba dei na kawei pat ka jingngeit, kane ka kyntien kan ym mih satia. Kaba lyngngoh pat ka long ba katto katne sngi shwa ba u Himanta un kynnoh ïa ka USTM bad Meghalaya, u la sneng bad kyntu ïa ka Myntri Rangbah ka West Bengal, ka Mamata Banerjee, ba kam dei ban kynnoh ïa ka jylla Jharkhand namar ka jingshlei um ha West Bengal. U la ong ruh ba man la u snem, ka um kaba tuid na Arunachal Pradesh bad Bhutan ka ju pynshlei ïa ka Assam, hynrei ka sorkar jong u, kam ju tei pop pat ïa ki. U Himanta u la ong ba u burom ïa ka Mamata, hynrei um pdiang pat ïa ka jingkynnoh jong ka ba ka sorkar Jharkhand ka dei ban shim jingkitkhlieh halor ka jingshlei um ha West Bengal. U la sneng ruh da kaba ong ba baroh artylli ki sorkar jylla ki dei ban ïatreilang khnang ban pynduna ïa ki jingeh jong ki paidbah.
Hangne ka pyni ba u Himanta u la tep ïa la ka jong ka nia bad ka nongrim – halor ka jingshlei um ha West Bengal, u la ong ba ym dei ban kynnoh ïa ka Jharkhand, hynrei ha kaba ïadei bad ka jingshlei um ha Guwahati, u la kynnoh ïa ka USTM bad ka Meghalaya. U juh u briew u don artylli ki nongrim halor kajuh ka phang? Kumno ka lah ban long? Lada shah ktah ka shnong lajong, kynnoh ïa kiwei, bad lada shah ktah kiwei, wan pat hakhmat-hakhmat ban batai ba ym dei ban kynnoh ïa kiwei? Namarkata, u Himanta dalade ïalade u la pynpaw ba u dei uta u nongïalam uba don bun jingmut halor kawei ka phang bad um lah ban long uba ïaineh. Lada u bud kumba u la sneng ïa ka Mamata, ngi tharai um rat da pyndonkam ïa kito ki kyntien ‘Flood Jihad’ bad un jin da la kren da kumwei pat. Ka long kamkai ba kat u Myntri Rangbah jong ka jylla kaba heh bad kaba dei ruh ka khyrdop ban rung sha ka thaiñ Shatei Lam Mihngi un pyndonkam ïa ki kyntien kiba ktah beit ïa ka jingngeit jong ki briew ki bym dei na kajuh ka niam kum ma u. Lehse u la pyrkhat ba da kaba kren kumtei, ki paidbah nongshong shnong ka Guwahati kin kiar noh na ka jingkynnoh ïa u bad kin shu ñion beit noh tang ïa ka USTM bad ka Meghalaya.
Ngim lah ban khang ïa ka jingtuid jong ka um – ka um kan ïaid beit la ka jong ka lynti, hynrei ka dei ka kamram jong ka sorkar ban peit ba kin don ki nala kiba heh bad kiba lah ban ïada na ka jingshlei jong ki surok. Ngi la ïohi ha kine ki sngi ba namar ka jingjur slap, ka sor Nongpoh ruh ka la dap um. Hato ngin kynnoh ïano? Ngin hap ban pynbiang ïa ki nala khnang ba ka um kan ym tuid ne pyndap ïa ki surok. Ha nongbah Delhi ngi la ïohi ba ka long kumjuh ha kane ka aïom slap. Ka um ka ïaid beit kumba ka dei ban ïaid bad kan rat kat ïa kiba pynwit. Kane ka dei ka rukom jong ka um ha kano-kano ka bynta jong ka pyrthei. Hynrei haba la bun u bynriew bad khapngiah ki jaka, yn hap ban ïa pyrkhat kumno ban shna bha ïa ki nala bad ban pyntuid sha ki thaiñ kiba dang kham duna ki nongshong shnong lane sha ki wah bah.
Ngi sniewbok ba ka Ri ka don ïa ki nongïalam kiba nang tang ban kren pynshit ne ban pynïapait ne ban pynïapher ïa ki para briew ha ka kyrteng jong ka niam ne jingngeit. Ngi la ïohi pat ba u paidbah u jubab kumno ha ka ilekshon ynda u la ngiah la kdang ïa kiba kum kine ki nongïalam kiba lapmiet tang ban pynpait pynpra ïa ka Ri. Kat nang ïaid ki sngi bad ki snem, ka jingkren pharia jaitbynriew ka la nang jur. Dei sa tang da ka bor jong ki paidbah ha ki ilekshon ba lah ban pynsangeh bad pynshongthait syndon ïa kiba kum kine ki nongïalam bad ka ban long ruh kum ka jingsneng ïa kiwei pat kiba don ïa kajuh ka pyrkhat ka pyrdaiñ. Ki nongshong shnong ki lah ban sngap shisien ne arsien ïa kiba kum kine ki jait nongïalam, hynrei kin ym sngap baroh shirta. Ha kaba kut, ka Assam kan ym lah ban kiar na ka Meghalaya bad ka Meghalaya kan ym lah ban kiar na ka Assam. Namarkata, donkam ïa ka jingïatreilang ban weng ïa ki jingeh jong ki paidbah kiba don ha baroh artylli ki jylla, kumba u Himanta u la sneng ïa ka Mamata.
