Shillong, Nailar:
Ki nongpynpoi kyiad bad ki Bonded Warehouse ne kudam buh kyiad napoh ka Meghalaya ki la mad jingeh namar ka jingshah khang ban ïaid lyngba na Assam ban leit pynpoi mar sha rilum Garo.
Kane ka jingshem jingeh jong ki nongleit pynpoi mar bad ki Bonded Warehouse sha rilum Garo, ka dei ba kim ïoh ka Transit Pass ne jingbit na ka Sorkar Assam ban ïaid lyngba na Assam sha rilum Garo.
Wat la ka don ka surok na Shillong sha Tura bad sha kiwei ki bynta jong ka rilum Garo lyngba ka surok na Nongstoiñ, hynrei ki nongpynpoi mar bad ki bonded warehouse ki lap ba kane ka surok ka kham jngai bad ka jinglut ruh ka long kaba heh, hynrei ki la pynpaw ba kham jan na Assam bad ka jinglut ruh ka duna.
Ha kaba ïadei bad kane, u Myntri ka tnat Excise u Bah Kyrmen Shylla u la ong ba ka Assam dang shen ka la khang bad bat ïa ki kali na Meghalaya ban ïaid lyngba, kaba la pynlong bad pynsngew ïa ki nongkhaïi kyiad napoh ka jylla ba ki shah leh beiñ bad shah peit shiliang.
U Myntri u la ong, ki nongkhaïi bad ki Bonded Warehouse na Meghalaya ki la dep phah jingthoh sha ka Sorkar Meghalaya haba ïadei bad ka jingkyntait ka Sorkar Assam ban ai Transit Pass.
U Bah Kyrmen u la ong ba ka Sorkar Meghalaya kan sa phah jingthoh bad ban ïakren bad ka sorkar Assam ban pynbeit bad weng noh ïa kine ki jingeh. U la ban ruh ba kam dei satia ban don ka daw ban ïaleh ne don jingïapher hapdeng ka Meghalaya bad Assam bad ïa kane ka mat kaba la mih donkam ban pynbeit bad weng noh.
U la kyrpad ruh ïa ka sorkar Assam ban pynshai halor ki kyndon kiba thymmai ba ïadei bad ka jingkyntait ban ai Transit Pass ïa ki kali ban pynpoi mar sha rilum Garo.
