Hadien ka thma ktien bad ka USTM, kyntu syndon u Himanta ïa ki paidbah ban mudui sha ka NGT

Guwahati, Nailar 13

Hadien ka thma ktien bad ka skulbah USTM kaba don ha Meghalaya ha khappud bad ka Assam, u Myntri Rangbah ka Assam, u Himanta Biswa Sarma u la kyntu syndon ïa ki paidbah ban mudui sha ka National Green Tribunal (NGT) ban khanglad ïa ka rukom tih pathar ïa ki jaka ba long kum ha Meghalaya ha kaba u la kynnoh ba ka skulbah USTM ka dei ruh kawei kaba la pyntreikam ïa ka ‘thma shlei um (flood jihad)’ ha ki jaka them ha sor Guwahati.

Kane ka jingpynphai ktien biang u Himanta ka la wan tang hadien shisngi ba ki nongpynïaid ka skulbah University of Science and Technology Meghalaya (USTM) ki la pynshai bad kyntait ïa ka jingkynnoh u Himanta ba ka jingtih bad pom pathar ïa ki jaka lum kynthup ha kane ka skulbah ka dei kaba la pynlong ban jur ka jingshlei um ha ki jaka khappud kiba hap hapoh u pud u sam ka Assam kaba la poi shaduh sha sor Guwahati.

Kumta u Himanta u la kyntu ïa ki paidbah ka Guwahati kiba mad ïa kane jingeh namar ka jingshlei um ban leit ujor sha ka NGT kum kawei na ki lad ban pynsngew ïa ka jingeh na ka bynta ban khanglad ïa ka jingtih bad jingpom pathar ïa ki jaka lum kiba don hapoh ka skulbah USTM.

Nalor ka jingkyntu ïa ki paidbah, u Himanta u la ong ruh ba ka sorkar Assam ruh kan leit mudui sha ka NGT pyrshah ïa katei ka skulbah USTM kaba don ha u pud u sam ka Meghalaya namar u la kynnoh ba ka rukom tih pathar ïa ki lum kynthup ha phyllaw jong kane ka skulbah ka la long ka daw jong ka jingshlei um kaba jur ha Guwahati.

Une u Myntri Rangbah ka Assam u la ong ba ka Sorkar jong u ka dang shim ruh ïa ki lad ki lynti ban weng ïa kane ka jingeh ha kaba la thaw ïa ka Committee jong ki riewshemphang, bad ka Committee kan sa ai jingmut ha kaba ïadei bad ki lad ki lynti ban pyntuid ïa ka um ha nongbah Guwahati ban nym don ka jingsahkut.

U la ong ba ka jingtih pathar ïa ki lum ha thaiñ Jorabat, ka jingshlei um ka la nang kiew ha Guwahati.

“Kito kiba kynthoh ïa nga ki dei ban tip bad kynmaw ba ka jingshlei um ka kham jur ha Dispur bad ki jaka kiba marjan bad ka Jorabat, ban ïa kiwei pat ki bynta jong ka nongbah,” la pynpaw u Himanta haba ïakren bad ki nongthoh khubor ha ka Sngi Ba-ar.

Ka USTM ka don ha thaiñ 9th Mile, Ri-Bhoi district ha khappud bad ka Assam.

“Ki briew kiba mad ïa ka jingeh, ki lah ban leit ujor sha ka NGT ban pynsangeh noh ïa ka jingtih pathar ïa ki jaka lum ha Meghalaya”, u la ong.