Shillong, Nailar:
Shi bynta ka jinglehkmen ‘Independence Day’, ka Kyrmen Foundation ha ka 10 tarik Nailar ka la pynlong da ka Awareness Cum Voluntary Blood Donation Camp ha ka shnong Madankynsaw- Mowkyndeng, West Jaiñtia Hills ha kaba la don 8 ngut kiba la synñiang snam sngewbha.
Ha kane ka sngi la donlang u Myntri ka Sorkar Jylla, u Bah Kyrmen Shylla uba la ai khublei ïa ka shnong bad ki nongshong shnong kiba kloi ban synñiang sngewbha ïa ka snam.
U ADC ka West Jaiñtia Hills Distric,t u Bah Wankhraw K. Kharbuli, ka Dr. I. Khyriam, Senior Medical and Health Officer, u BDO ka Laskeiñ Block, Bah Barister Niang, kumjuh ki Waheh Shnong kiba la ïadonlang ha kane ka sngi ki la pynpaw ka jingsngewnguh bad pynshlur ïa ki nongshong shnong ban pynneh ïa kane ka kam ïarap para briew.
Ka shnong Madankynsaw-Mowkyndeng hapoh ka jingïalam jong u Waheh Shnong, Bah Bud Rimanki Chympa, ka dei ka shnong ka banyngkong eh ban pdiang ïa kane ka Awareness Cum Voluntary Blood Donation Camp.
Ka Kyrmen Foundation ka ai khublei kyrpang ïa baroh ki nongshong shnong kiba ïashim bynta bad khamtam ïa ka shnong bad ka la ai mynsiem ruh ban bteng ïa kane ka kam ba bha man la u snem. Na ka liang ka shnong ruh ka la kitbok-kitrwiang ïa ka Kyrmen Foundation halor ki kam ba bha jong ka na ka bynta ka imlang-sahlang.
