Shillong, Nailar:
Ka Samsung India mynta ka sngi ka la pynbna ïa ki 20 tylli ki kynhun na ka ri kiba la shah jied ban ïoh rung sha ka lympung ïakhun National ka bynta jong ka Flagship CSR Programme kata ka ‘Solve for Tomorrow’ 2024. Kine ki kynhun kiba la long kiba la pynkhreh ban ïashim bynta ha ka lympung jong ka National, ki dei kiba mih khmat na ki bynta bapher bapher jong ka ri ba kynthup ïa ki nongïashim bynta na ki 12 tylli ki jylla bad 2 tylli ki Union Territories ha kylleng ka India. Ki katto katne ki nongïashim bynta ki mih khmat na ki shnong kiba kyndong bha kum ka Imphal ha Manipur, East Khasi Hills ha Meghalaya bad Bilaspur ha Chhattisgarh.
Ha ka wat kaba 3 jong ka prokram, ki khynnah bad samla pule ki la ai ïa ki jingmut hapoh ar tylli ki bynta- ‘Community and Inclusion’ bad ‘Environment and Sustainability.’ Kumba 20% na ki jingai jingmut ha ka thup jong ka School Track ka phai khmat ha kaba ïadei bad ka pule-puthi bad kumjuh ruh ban ïoh ïa ki lad ki lynti na ka bynta kito kiba duna ha ka ïoh ka kot, ki jingeh kiba ïadei bad kumno ki khynnah kin ïoh ban pyrshang ïa kiei kiba la hikai bad ban tip shaphang ki Digital. Kumba 25% na ki jingai jingmut ha ka thup jong ka Youth Track ka dei shaphang kumno ban pynneh pynsah ïa ka um, ka jingjaboh na ka daw ka Arsenic, ka jingpynlut kai ïa ka um, bad ka jingbym biang ha sawdong-sawkun ha ki jaka ba don um. Nalor kane, jan kumba 40% jong ka jingai jingmut ka phai khmat ruh ban pynduna ïa ka jingjaboh ka lyer na ka daw jong ki tdem kali, ka jingbym biang ki rukom ban pynkhuid ïa ki jaboh-jabaiñ, bad ka jingkynrei ka jingpyndonkam ïa ki plastik ba pyndonkam shisien, bad ka jingpluh ki khlaw ki btab.
“Ka Samsung’s flagship CSR Programme, ‘Solve for Tomorrow,’ mynta u snem ka phai khmat kumno ban pynkup bor ïa ki khynnah skul bad samla pule ha ki kolej ban wad ïa ki sienjam kumno ban pynduna ne ïaleh ïa ki jingeh kiba ka pyrthei ka ïakynduh ha kine ki sngi da kaba pyndonkam ïa ki kor teknoloji. Mynta u snem ngi phai khmat ban pynshlur ïa ka jingïashim bynta na ki shnong kiba kyndong bha ha ka ri, bad ngi sngewkmen ïa ka jingïashim bynta jong ki khynnah bad samla pule na ki bynta bapher bapher jong ka ri. Ngi kitbok kitrwiang ïa ka jingïaid lynti sha ka Innovation Walk ha ka ophis jong ngi bad ha ka R&D Centre bad ha kaba khatduh ban ïashim bynta ha ka National Pitch Event ha IIT Delhi,” la ong u SP Chun, Corporate Vice President, Samsung Southwest Asia.
