Shillong, Nailar 14
Ka tnad ka koit ka khiah ka Sorkar Jylla ka dang ap ïa ka kaiphod ban pyntikna la ka don ne em ka jingshah ktah na ka jingpang ‘Polio’ hapoh ka Jylla.
Haba kren sha ki lad pathai khubor ha ka Sngi Balang, ka DHS (MCH & FW), Dr. J. S. Momin ka la ong ba ka don kawei ka jingjia ha kaba iwei i khyllung ba dang 2.5 snem ka rta na Tikrikilla, West Garo Hills i la shah sumar ha Goalpara Civil Hospital.
Haba kdew ba ka kaiphod ka pyni ïa ka jingshitom ‘Acute Flaccid Paralysis’, ka Dr. Momin ka la ong ba la shim ïa 2 tylli ki nongmuna bad la phah ïa ki sha ka jaka peit bniah ha Kolkata bad ICMR-NIV Mumbai Unit.
“Ngi dang ap ïa ka kaiphod bakhatduh. Ngim pat lah pyntikna ïa kane katba ngim pat ïoh ïa ka kaiphod bakhatduh,” ka la ong.
Ka DHS (MCH & FW) ka la ïathuh ruh ba ka tnad ka koit ka khiah ha ryngkat ka jingkyrshan ka WHO ka dang ïaid shakhmat bad ka jingpeit bniah bad ki dang ap shuh ïa ki risol.
“Ïa mynta, ki nongtrei jong ngi na WHO ki la leit sha Trikrikilla ban khmih bniah ïa katei ka kam kumjuh ban lum nongmuna na i nongpang bad ka imlang-sahlang na bynta ka jingpeit bniah,” la ong ka Dr. Momin.
Ha kawei ka liang, ka Joint DHS (MCH & FW), Dr. B. Mawlong ka la ong ba lada lap ba ka long kaba shisha, kata kin hap leh biang sa kawei ka jingpeit bniah ban lap la u dei u ‘Circulated Virus’ ne ‘Immunodeficiency Virus’.
Shuh shuh ka la bynrap ba lada dei u ‘Immunodeficiency’, kata ka dei ka ‘Isolated Case’, bad lada dei u ‘Circulated Virus’, kata kin hap leh ïa ka jingpeit bniah na bynta ka imlang-sahlang ba kynthup ïa ki bahaïing bahasem.
Kum ban shu kdew hangne, katkum ki khubor kiba la mih, la ong ba la lap biang ïa u khñiang ‘Polio’ ha ka thaiñ Ri-lum Garo jong ka Jylla.
