K. Pala
Ha ki ri bapher bapher ha ka pyrthei ka hok ki kynthei ban long trai ïa ka khyndew bad ban long ka nongkynti ha ïing kim shym ïoh. Ka aiñ ka ai ïa ki kynthei khyndiat ka hok ban ïa ki shynrang. Kane ka la pynlong ïa bun ki kynthei ban shaniah beit ha ka jingpynïaid u shynrang la ka dei ha ka kamai ka bai lut bai sep bad kiwei kiwei, bad kane ka la pynlong ïa kiba bun ki kynthei ban long kiba shem lanot bad ngat ruh ha ki jingshah thombor shah lehbeiñ khamtam lei lei kito kiba la ïap lok ïashongkhlad shong marwei bad kito kiba ka jingïashongkha kam long kaba la ithuh da ka aiñ. Ki kynthei ki lah ban pyndonkam ïa ka khyndew ka jaka bad kiwei kiwei ki lad jingïarap kiba donkam ban ïoh ïa ka hok bad ban im ka jingim kaba bha. Ki lad jingïarap kin kyrshan ïa ki kynthei ban pyndap pynbiang ïa ka jingim jong ki ba manla ka sngi kumjuh ruh ha ka ïing ka sem, ki khun ki kti khnang ba kin lah ban ïaleh pyrshah ïa ki jingeh kiba ki ïakynduh ha ka jingim jong ki.
Ka imlang ka sahlang ha Ri – India ka long kaba noh shilliang khamtam leilei ha ka liang ha ka liang ki khun kynthei ïa kiba la kheiñ kum tang kum ki briew ba shipor ha ka longïing bad tangshu leit shongkurim kin leit sahnoh sha kawei pat ka longïing. Kane ka pynpaw ba ha ka jingmut jingpyrkhat khamtam ha ki dkhar ka noh shiliang sha ki khun shynrang ba kin long ki nongioh kynti ïa ka jaka ka khyndew ha ïing bad maki dei ki nongsumar ïa ki kmie ki kpa ynda ki lah tymmen. ïa kane ka jingngeit ym tang kiba duk ki ïa bud hynrei wat kiba la nang la stad kiba riewspah ruh ki ïa bud lang ha ka imlang ka sahlang (lait noh ha Meghalaya).Kiwei kiwei ki daw ki pynlong ban kniehnoh ïa ka jinglong trai na ki kynthei ka long ba ka kam ki kynthei ka long ban peit ïa ka ïing ka sem bad sumar ïa ka ïing. Ha ki thaiñ nongkyndong ka don ka jingïadei kaba jan jong ka khyndew bad da ki nongioh kynti ïa ka jaka bad ki longïing hi ki kwah ba kan neh beit pateng la pateng bad dei na kane ka daw ba bun ki longïing ki jied ïa u shynrang ban long u nong-ioh kynti.
Ha ki thaiñ nongkyndong ka jaka ka khyndew ka dei ka jong u shynrang ka pynduh bor noh ïa ka kynthei. Ka sorkar India ka ïarap ban pynioh ïa ki bank account bad ki cre-dit ha ka kyrteng jong ki trai jaka, bad kane ka mut ba ki kynthei ki la duh noh ïa ka hok ha ka liang ka kam peisa. Ka sorkar da ka ai jingmyntoi ruh ai jingïarap ruh ka hap ban ai sha u shynrang uba long trai, bad ka long kumba ki kynthei ki shah peit shiliang. Lada u shynrang u leit trei sha kawei ka shnong, dei ka kynthei kaba hap trei, hynrei naka daw ki jingai jinghikai ban pynsngewthuh kim biang shaphang ka pisa ka kam khaii pateng bad ka jingbym don kyrteng jaka kiba biang ki duh noh ia ki jingmyntoi kiba ka Sorkar ka ai kum ki loan, sub – sidy ha ki marbam mardih namar kine baroh donkam ka kyrteng ki trai ïing trai jaka kiba biang, bad ka jingshah knieh noh ban long trai ïa ka jaka ka khyndew ka ailad ruh ïa ki riewshim kabu ban ïoh knieh ei ïa ka jaka. Ka jingduh noh ban long trai ïa ki jaka, ki kynthei ki kynduh ruh bun ki jingeh wat ha ki jaka ba don ha sor ruh. Ki longïing kiba duk kiba sah ha slum bad ki bym don ka jaka ka khyndew bad kiba don ruh da ka jingai jingïarap ka Sorkar la ai beit ha ka kyrteng jong u shynrang. Katba ki longïing ha sor kiba la bit la biang ka rukom im ka kham pher, ki kynthei ki iohlad ban trei ban ktah ym tang ha ïing hynrei wat sha bar ruh kumjuh. Hynrei watla katta ruh ka jingshah kñieh noh ïa ka hok ban long trai ïa ka jaka ka khyndew ki dang ïai jia. Ka longïing kaba la im ha ka khaiï pateng kaba heh ki kynthei na kane ka longïing ki duh ban longtrai namar kine ki longïing ki kham jied ïa u shynrang ban long u nongioh kynti bad ban pynïaid ïa ka khaiï ka pateng ka ïing pateng la pateng. Dei ka jingduh ban longtrai ka kynthei ka ïalam sha ka jingduna jong ki kynthei ban ïashim bynta ha ka liang ka imlang ka sahlang bad ban ai ka rai ha kano kano ka liang.
Ka Sorkar ka la ithuh ïa ki jingeh bad ka la shim ruh ki lad ki lynti ban ailad ïa ki kynthei ban long trai jaka. Ka Hindu Succession Act 1956, la pyllait ïa kane ka Act ha u 2005, la shim ruh ki lad ban pynlong ïa ki khun kynthei ban ïoh kajuh ka kyrdan bad long nongkynti. Bun kiwei de ki aiñ ba la thaw thymmai naduh ki por ba ïoh la ka jinglait-luid ha India, bad ka jingiohlang ki kynthei ïa ka bhah ban ïoh long nongkynti, hynrei ha ka jingkheiñ kyrdan katjuh bad u shynrang ka dang duna. Hooid ka aiñ ka ai kajuh ka hok hynrei dei ki riti ki dustur ki niam ki rukom kiba long ki jingeh ban ithuh ïa ka hok ki kynthei ha Ri – India.
Kine ki riti ki dustur ka niam ka rukom ki khanglad ïa ki kynthei ha Ri – India khamtam ki hindu, ki muslim bad kiwei, ban ïoh lem ïa ka bhah ban long trai ïa ka jaka ka khyndew. La donkam da ka aiñ kaba kham khlaiñ ka ban ïarap ïa ki kynthei ba kin ïeng ha la ki jong ki kti ki kjat, ba kin kñieh ruh ïa ka hok la jong bad sdang ruh ban pan ïa ka jaka ka khyndew kaba ki dei hok ban ïoh. Ka Sorkar India kala sdang ban seng ïa ki womens, self help group (Mahila Samakhya Programme) kine ki self help group kin ai jingkyrshan ïa ki kynthei ha kaba ïada bad ki jingeh kiba ki ïakynduh kum ha ki ïing ki sem, jingshah ban beiñ etc kiba ha rukom.
Ha kawei pat ka liang kine ki jingeh kiba ki kynthei ki ïakynduh ka dei ruh na ka jing-long jong ki hi. Kine ki jingeh ki nang kham jur shuh shuh ynda ki la duh noh ïa ki jingkyrshan na la ïing, khamtam ïa kito kiba shong marwei, ba ïashongkhlad, ba ïap lok, Ki prokram kiba ai jinghikai halor ka hok ka jinglong briew bad ki jingthmu ban wanrah jingkylla kan wanrah ïa ka jingbishar kaba hok, ka jingryntih ha ka imlang sahlang bad kan pynbha ruh ïa ka jingim ki kynthei.
