Ka seng Indian National Congress (INC) ha ka 16 tarik Nailar, 2024 ka la sospon hynriew snem ïa ki arngut ki MLA jong ka, kata, u Bah Charles Marngar na Mawhati bad u Bah Gabriel Wahlang na Nongstoiñ halor ka jingkynnoh ba ki la leh ki kam kiba long pyrshah ïa ka seng ha kaba la ïoh ruh ïa ki kaiphod na ki Block Congress Committee kiba la kdew ba kine ki MLA ki don ka jingïajan bad ka Sorkar Meghalaya Democratic Alliance (MDA) ba la ïalam da ka National People’s Party (NPP). Ïa ka shithi kaba pyntip ba kitei ki ar ngut ki MLA ki la shah sospon na ka seng haduh hynriew snem la phah da ka General Secretary ka Meghalaya Pradesh Congress Committee ka Kong Wansuk Syiem kaba dei ruh ka MP barim ka jylla.
Kane ka jingshah sospon jong u Bah Charles bad Bah Gabriel ka la wan hadien ka jingmih khubor ba ki don lai ngut ki MLA ka seng Congress kiba la pynkhreh ban pynïasoh noh sha ka NPP hashwa jong ka Dorbar ki MLA mynta u bnai. Hynrei na ki lai ngut, dang tang kine arngut kiba la shah sospon, bad namarkata, kin ym lah shuh ban phet seng. Lada ki kwah ban pynïasoh sha ka NPP, kin hap ban iehnoh shwa ïa ka jinglong MLA bad kin hap ban ïakhun da ka ilekshon bathymmai lym kumta kin shah mait kyrteng katkum ki kyndon jong ka Khyrnit ba Shiphew (Tenth Schedule). Da kaba sospon ïa ki, ka seng Congress ka la khang lad syndon ïa kine ba kin leit sha ka NPP da kaba shu ryngkoh bad khlem da donkam ban hiar shuki shwa.
Kane ka jingjia mynta ka sngi ka pyni ba ka jingjot jong ka seng Congress naduh u snem 2021 ka ïai bteng. Ka jingjot ka la sdang naduh ba u MP barim, u Bah Vincent H Pala, u la shah thung kum u President ka Meghalaya Pradesh Congress Committee (MPCC). Ka All India Congress Committee (AICC) ka la thung ïa u kum u President ka MPCC ha u snem 2021 da ka jingpyrkhat ba un lah ban pynkhie im bad pynkhlaiñ ïa ka seng. Phewse ka la long da khongpong. Hashwa ka ilekshon 2023, ym don shuh wat tang uwei uba la neh ha ka seng napdeng kito kiba la jop na ka Congress ha u snem 2018. Nyngkong, ki la mih shwa 12 ngut ki MLA hapoh ka jingïalam jong u Dr Mukul Sangma ban pynïasoh sha ka seng All India Trinamool Congress (AITC). Sa san ngut ki MLA kiba khlem treh ban leit sha ka AITC ki la shah sospon ha ka AICC hadien ba ki la leit ai jingkyrshan ïa ka Sorkar MDA-I. Ynda la dep ñiew ïa ki ‘vote’ ha ka ilekshon MLA 2023, ka Congress ka la jop sa tang san ngut bad wat u Bah Pala u shah rem na la ka jong ka konstitwensi.
Ngim tip kumno ka AICC kam ïohi ne ka lym kum bym ïohi halor kane ka jingbteng ban jot ka seng Congress hapoh ka jingïalam jong u Bah Pala. Ngim tip lano kan kyndit bynriew. Lada kam lah ban teh lakam ïa kane, ngim tip shuh kaei ka ban jia ïa ka Congress ha kine ki por ban wan. Ngin hap ban peit shwa na ka ilekshon MDC ha Khasi Hills Autonomous District Council (KHADC) bad ka Jaiñtia Hills Autonomous District Council (JHADC) la ka Congress kan dang don lynti ne em. Lada ngi phai sha ka ilekshon MP kaba la dep, ka jingshah rem kput jong u Bah Pala ha u kyrtong ka Voice of the People Party (VPP) kam dei satia ka dak kaba bha na ka bynta ka seng Congress. Lada ka lyer jong ka VPP ka neh, ka Congress bad kiwei ki seng ki lah ban ym jop wat tang uwei ruh u kyrtong ha ka ilekshon MDC bad kane ka kynthup lang ha Rilum Jaiñtia.
Ka lynti ka don ban pynim biang ïa ka Congress. Kawei na kita ki lynti ka long ban thung noh da uwei u nongïalam ka Congress ha ka jaka jong u Bah Pala. Ki paidbah bad ki nongkyrshan ka Congress ki la sngewthuh ba ka seng kan ym don lawei lada ka jingpynïaid ka neh sah bad une u MP barim. Ka Congress ka dang don da kiwei pat ki nongïalam kiba kham shyrkhei ban btin lynti ïa ka seng. Don kiba ïakren ba lada shah weng u Bah Pala, kito kiba la phet ha ki snem kiba la leit noh ki kloi ban wanphai biang bad pynkhlaiñ ïa ka seng. Hynrei kata ka rai pat kan ym shong ha ki; ka shong ha ka AICC bad kito kiba peit na Delhi. U Bah Pala uba baroh ngi tip um dei satia u ‘riew saiñpyrthei, bad kam ïahap ban buh nongïalam da ki bym dei ki ‘riew saiñpyrthei namar kan wanrah ïa ka jingjot.
Ha kine ki sngi, lehse ka jinglong jingman ha ka saiñ hima sima kan nang itynnad hadien ba kitei ki arngut ki MLA kiba dang shu jop dang shi snem tam mynta, ki la shah sospon noh. Lada kane ka jingshah sospon ka neh sah, kin ym lah ban ïakhun ilekshon na kiwei pat ki seng khlem da hiar shuki shwa kum ki MLA. Lada ki pdiang beit ïa ka jingshah sospon, kin hap ban shong haduh ba kut ka san snem, bad hashwa ka ilekshon MLA 2028, kin hap ban hiar shuki kum ki MLA bad jied da kawei pat ka seng saiñpyrthei.
