Shillong, Nailar:
Ka Khasi Students’ Union (KSU) East Jaiñtia Hills District Unit ha ka Sngi Balang ka la ïoh ban ïakynduh ïa u Deputy Commissioner (DC) ka East Jaiñtia Hills ban ïakren halor ka kynrum-kynram bad ka huri-hura ha Bangladesh ba na ka liang ki bor district kiei ki sienjam lane ki lad peitngor ki la shim, ïoh lehse don ki khar Bangla kiba shim kabu ban ïoh rung tuh shapoh ka jylla Meghalaya lyngba ki thaiñ khappud.
Ka KSU ha kane ka jingïakynduh, ka la pyntip ba ha East Jaiñtia Hills ki don katto-katne tylli ki shnong kum ka Huroi, Hingaria, Lailong (Lahaleiñ), Borsara, Lejri, Dona Bhoi, Donaskur, Dona Umbluh, Ampyrdit, Lumsohski bad kiwei kiwei kiba don ha syndah bad ka Ri Bangladesh.
Ka KSU ka la ong ruh ba ka jylla mynta ka shong syier na katei ka jingïakynad ha katei ka ri bad la ïohi ruh lyngba ki lad pathai khubor da ki hajar ngut ki khar Bangla ki thmu ban wan rung jubor na ki thaiñ khappud West Jaiñtia Hills na Dawki Pyrdiwah.
Shuh shuh, ka KSU ka la pyntip haba ïakren bad u DC, u la ïathuh ba haduh mynta ym pat don kano-kano ka jingrung tuh lyngba ka district East Jaiñtia Hills, ïa mynta ka dang long jai-jai. Ka seng ka kyntu ïa u DC ba ym dei ban shim sting hynrei ban bthah ïa ki bor shnong khamtam kito ki shnong ba don ha khappud bad ka ri Bangladesh ban long kiba peitngor.
Ha kawei pat ka liang, ka seng ka la pyntip ba ha ka 17 tarik mynta u bnai kan leit sha shnong khappud sha Huroi ban lum ka jingïalang bad ki dkhot jong ki shnat treikam ba don shato bad kumjuh lem bad ki nongïalam shnong ban ïathir ïatai halor kane ka kam.
