Jowai, Nailar:
Ka FKJGP West Jaiñtia Hills District ryngkat ka Synjuk Waheh Shnong War Jaiñtia ha ka Sngi Balang ki la leit ban ïakynduh ïa u Deputy Commissioner ban ïakren halor ka jingduna bor pahara ha ka thaiñ khappud India bad Bangladesh.
Ha shwa ka jingïakynduh ïa u DC, ka FKJGP bad ka Synjuk Waheh Shnong War Jaiñtia ha ka 13 tarik ki la hiar jurip sha ka khappud naduh Dawki, Bakur, Riahjalong, Amsapnuh, Nongkhen Amlangpiang, Amdoh, Amsku, Rongkung, ha kaba ki la lap ïa ka jingduna ki shipai BSF ban pahara naduh na Riahjalong ter ter haduh ha Rongkung. Kane ka jingduna ki bor pahara kan pynsuk shibun ïa ki nong Bangladesh ban rung tuh shapoh India artad bym pat dep ka jingker sainar shiah.
Ha ka jingïakynduh ïa u DC, na ka liang ki Waheh Shnong bad FKJGP West Jaiñtia Hills District ki la kyntu ïa ka bor pynïaid district ban shimkhia ïa kane ka kam da kaba pynbiang ïa ki shipai BSF ha shilynter ki jaka khappud bad ka ri Bangladesh.
U Assistant Waheh Shnong ka Bakur, u Bah A Khonglah u la ong ba na ka liang u DC u la pyntip ba ki shipai kiba don ha khappud ki leit phai ïing ha kine ar-lai sngi bad u la kular ban shimkhia ban pynbun ïa ki shipai BSF ha khappud.
