Doha, Nailar:
Ka kynhun lehnoh Hamas jong ka Palestine, ha ka Sngi Palei ka la pynpaw ia ka jingdawa ba ka jing-iakren iasuk bad jingsangeh thma hapoh Gaza ka dei ruh ban kynthup ia ka jingpynmih noh ia ki shipai ka Israel baroh napoh u pud-u sam jong ka nongbah Gaza. Lada kam long ha katei ka rukom, ka Hamas kam lah ban pdiang ia katei ka jingiakren sangeh thma da lei-lei ruh.
Namar ka Hamas ha ki jingiakren kiba la ju pynlong baroh shi katta ruh, ka la dep pynpaw shai ia kane ka jingdawa ba ka Israel ka dei ban phah mih noh shwa ia baroh ki shipai jong ka na Gaza lada ka kwah ban poi sha u pud jong ka jingiakren iasuk ne ban sangeh noh ia ka thma.
Kumjuh ruh na ka liang jong ka Israel ka la pynpaw ia ka jingdawa ba ka Hamas ka dei ban pyllait noh ia baroh kito kiba ka la rahbor naduh ba sdang jong ka thma lada ka kwah ban lait na ka jingpynjot jong ka Israel.
