Mawkyrwat, Nailar 16
Ka Maram FC ka la long ka lahduh ha ka lympung ïalehkai 3rd Independence Cup Women Football Tournament 2024 ba la pynïaid da ka Kyntiew La I Sap Multipurpose Organisation. Kane ka wan urlong hadien ba ka la lah ban pynliem noh ïa ka Jakrem SC da 1-0 ha madan MDSA Stadium Mawkyrwat.
Haba phai sha kane ka jingïakhun final kaba la long ha ka Sngi Palei, ka long kaba itynnad bad kaba ïakhaid bha ha kaba baroh artylli ki kynhun ha ka kylla step kim shym la lah ban pynkhih jar.
Ha ka kylla miet ka Maram FC ka la lah ban ïalehkai bha bad dei ha ka minit kaba 57 ba ka la ïoh ban pynkhih jar nyngkong lyngba ka Ridalin Suting. Lyngba kane ka shi kol ka Maram FC ka la pynthikna ïalade ban long kum ka lahduh jong kane ka lympung.
Da kane ka nam jop ka Maram FC la ïohpdiang ïa ka khusnam pisa kaba T. 15,000 ryngkat ka trophy, katba ka Jakrem SC ka la ïoh T. 7,000 . Ïa ka nam Best Player la ïoh da ka Samfida Nongrem jong ka Maram FC, Best Goalkeeper ka leit sha ka Banrikordor Wahlang jong ka Jakrem bad ïa ka nam Top Scorer la ïohpdiang da ka Fragrancy Riwan jong ka Jakrem SC kaba la thep haduh 5 kol ha kane ka lympung.
Ïa kane ka lympung la wan ban pynhap pynda da u Bah Kynphamlin V. KharLyngdoh kum u kongsan bad Bah Lambokstar Marweiñ kum u symbud kongsan, la pynïaid ïa jingialang da u Bah Benjohnson Lyngdoh Secretary ka KLISMO bad la ïoh ruh ban pynshit pynshngaiñ da ki sur jingrwai na u Bah Amnis Shangdiar
