Shillong, Nailar 16
U MLA ka Nongkrem Constituency, Bah Ardent Miller Basaïawmoit, u la ong ba ka Ri mynta baroh kawei ka don hapdeng ka jingma kaba khraw ïa ki rit paid hapoh ka jingïalam jong ka Sorkar Pdeng kaba la ïalam da ka National Democratic Alliance (NDA).
Ïa kane u Bah Ardent u la kren ha ka Sngi Palei ka 15 tarik u Nailar 2024 ha ka jingïalang rakhe ïa ka jingdap 78 snem ka jingïoh laitluid ka Ri India na ka jingsynshar ki dohlieh ba la pynlong ha ka Holy Child Higher Secondary School kaba don ha Demthring, Shillong.
Hadien ka jingpynher ïa ka lama lai-rong jong ka Ri, u Bah Ardent u la ai jingkren ha kaba u la batai lyngkot halor ka jingïaid lynti jong ka Ri ban ïoh ïa ka jinglaitluid.
Ha kajuh ka por, u Bah Ardent u la kren ruh shaphang ka jinglaitluid kaba don ha ki ar bynta ha kaba ka don ka jinglaitluid kaba bha bad ka jinglaitluid kaba sniew.
“Haba ngi pyndonkam ïa ka kyntien ‘laitluid’, nga ngeit ba ngi mut ka jinglaitluid. Ka jinglaitluid na ka jingshah teh mraw, ka jinglaitluid ban synshar ïalade katkum ka jingkwah bad jingstad jong ngi, ka jinglaitluid ban leh ïa la ka riti ka dustur, ka jinglaitluid ban phla ïa la ka jingngeit bad ka ñiam hynrei katkum ka jingïohi jong nga, ki don ar-jait ki jinglaitluid, ka jinglaitluid kaba bha bad ka jinglaitluid kaba sniew”, la ong u Bah Ardent.
U la ong ba ka jinglaitluid kaba sniew ka dei ka jinglaitluid ha kaba ki briew kim kwah ïa kano-kano ka jait jingïarap na uno-uno, ki kwah tang ban leh ïa kaei-kaei kaba ki kwah kaba ïaryngkat bad ka jinglaitluid kaba la khanglad. Kane ka jait jinglaitluid ka long kaba pynsniew ïa ka imlang sahlang bad ïa ka Jylla katba ka jinglaitluid kaba bha ka dei ka jait jinglaitluid ha kaba ki nongshong shnong ki aiti mon sngewbha katto-katne na ki hok shimet jong ki sha ka Jylla na ka bynta ka jingbha jong ka Jylla bad ban pynthikna ba ka synshar bad ka aiñ kin synshar.
“Nga kwah ban pynshlur ïa phi iwei-pa-iwei ba phin pdiang ïa ka jinglaitluid kaba bha bad ban kyntait ïa ka jinglaitluid kaba sniew”, la ong u Bah Ardent.
Nalor kata, u la buh jingkylli ruh ba hato ki paidbah ki im ha kata ka Ri kaba la ïoh ïa ka jinglaitluid kaba pura bad shisha bad hato la burom bad ïada ne em ïa ka riti synshar jong ka Ri?
Shuh shuh u Bah Ardent u la ong ba kumba ka long mynta hapoh ka jingsynshar jong ka sorkar ha ka Ri, ki rit paid ki don hapdeng ka jingma, namarkata, u la kyntu ba hapdeng ka jingleh kmen ha ka sngi ïoh jinglaitluid, ki paidbah ki dei ruh ban pynkynmaw ïalade ba hap ban ïada ïa ka Riti Synshar.
