Jowai, Nailar 16
Ka 7 Wasa United ka la long ka lahduh ha ka lympung ïalehkai Under-17 Football Tournament (Indepen-dence Day Cup) 2024 ba la pynïaid da ka West Jaiñtia District Sports Association (WJDSA). Kane ka wan urlong hadien ba ka la lah ban pynliem noh ïa ka Khimusniang lyngba ka tie-breaker da 4-3 kol ha ka jingïakhun phainal kaba la long ha ka 15 tarik mynta u bnai ha Kiang Nangbah Stadium, Jowai.
Ka jingïakhun ha kane ka sngi ka la long kaba ïakhaid bha bad ka por kaba la buh ka la wai da ka jingïakhaid khlem da lah ban pynkhih jar na baroh arliang ki kynhun. Kumta ïa ka jingïakhun la rah noh sha ka extra time bad hangne ruh baroh ar kynhun kim shym la lah ban pynkhih jar. Namar kata, ban ïoh ïa ka lahduh la rah noh sha ka jingïashut tie-breaker bad dei hangne ba ka 7 Wasa United ka la ïoh ban rah ïa ka nam lahduh.
Ha kane ka jingïakhun phainal la wan sakhi lang u Deputy Commissioner ka West Jaiñtia Hills District u Bah B.S. Sohliya (IAS), u District Sports Officer ka West Jaiñtia Hills District bad uba long ruh u Assistant Director u Bah Khroobok Passah, u Working President ka WJDSA u Bah E.M.H Passah, ki dkhot nongkitkam ka WJDSA bad kiwei kiwei.
Hadien ka jingïalehkai la sam khusnam sha ka lahduh ka 7 Wasa da ka song pisa kaba T.30,000 bad ka Khimusniang ka la ïoh T. 20,000 ryngkat trophy bad syrnot. La sam ruh ïa ki khusnam shimet kum ka ‘Top Scorer’ sha u rangïalehkai ka 7 Wasa u Riphi O Shylla uba la thep 5 kol. Ka ‘Man of the Match’ ka leit sha u Eny Manner, ka nam ‘Best Goalkeeper’ sha u Richard Khaii ka 7 Wasa bad ka nam ‘Player of the Tournament’ sha u Dawansalanmi Malang ka 7 Wasa.
