Shillong, Nailar 16
Ka lympung ïalehkai ASMITA Judo League East Zone ban pynïaid da ka Meghalaya Judo Association (MJA) kan sdang mynta ka Sngi Saitjaiñ ha Indoor Stadium jong ka SAI Training Centre, NEHU.
Ha kane ka lympung ka ban kyrshan lang da ka tnat ïalehkai jong ka sorkar pdeng lem lyngba ka Sports Authority of India (SAI), yn wan ïashim bynta da ki nongïalehkai Judo kylleng ka thaiñ shatei lammihngi jong ka ri kynthup na Bihar bad West Bengal, ki ban shim bynta ha ki saw tylli ki kyrdan kata ka Senior, Junior, Cadet bad Sub-Junior.
“Kin don kumba 45 ngut ki nongïalehkai ki ban mihkhmat ïa ka Jylla,” la pynpaw u Bah M.F Mawlieh uba dei u dkhot ka Meghalaya Judo Association haba ïakren bad ki nongthoh khubor ha ka Sngi Thohdieng.
“Ki nongïalehkai ki ban khur ïa ka takma ksiar bad rupa kin ïoh ïa ka lad ban mihkhmat ïa ka East Zone sha ka wat kaba khatduh (final round) na ka bynta ban ïakhun pat bad kiwei pat ki nongjop na kiwei pat ki zone.”
Kane ka lympung ka pynpaw nam ïa ka khusnam kaba kongsan kaba T. 4.26 lak bad ka jinglut jingsep kaba T.11.70 lak na ka bynta ban pynsaphriang ïa ka judo ha ka thaiñ. Ïa kane ka lympung yn wan ban plie da u Myntri ka tnat ïalehkai ka Sorkar Jylla u Bah Shakliar Warjri ha kaba ha kaba yn ïadon lang ki ophisar ka tnat ïalehkai bad kiwei kiwei.
