Shillong, Nailar 16
U Myntri Rangbah barim ka jylla, u Salseng C Marak, u la khlad noh ha ka Sngi Thohdieng ha ka rta 83 snem ha Tura hadien ka jingban jong ka jingshitom.
Ïa ka met kaba sah jong une u rangbah yn tep donburom ha ka Sngi Saitjaiñ ha Resubelpara, North Garo Hills, ha kaba ka sorkar ka la pynbna ba yn leh da ka ‘State Funeral’.
U Salseng u la khlad ha Tura Civil Hospital hadien ba la sumar shwa ïa u ha Holy Cross Hospital, Tura. Ïa ka met kaba sah jong u la pynkit noh sha ka ïing sah kaba don ha Resubelpara.
La kha ïa u Salseng ha ka 16 tarik Kyllalyngkot, 1941, bad hadien ba u la pyndep ïa ki jingpule ha ka Bachelors of Arts (BA), u la trei kum u Assistant Teacher ha Nishangram High School naduh 1965 haduh 1968, bad hadien kata, u la long kum u Headmaster ka Resubelpara Girls’ High School naduh 1968 haduh 1971.
U Salseng u la sdang ban don bynta bad ki kam saiñpyrthei ha u snem 1970, bad ha u snem 1972, u la shah jied kum u MLA na ka seng All Party Hill Leaders’ Conference (APHLC) na Resubelpara konstitwensi. Naduh u snem 1972 bad haduh 1998, u la shah jied lynter khlem shah rem bad u la don bynta noh bad ka seng Indian National Congress (INC). Hadien ba u la shah rem ha ka ilekshon ha u snem 2003 bad 2008, u Salseng u la wanphai biang kum u MLA ha u snem 2013 na Resubelpara.
U la long teng kum u General Secretary bad President ka Meghalaya Pradesh Congress Committee bad kum u Myntri Sorkar ha kaba u la bat ïa kiba bun tylli ki tnat treikam kum ka Industries, Excise, Food and Civil Supplies, Public Health Engineering (PHE), Public Works Department (PWD), Forests, Soil Conservation bad Tourism. Une u rangbah u la long ruh kum u Chairman ka State Planning Board.
Shuh shuh u Salseng u la ïoh bat ïa ka shuki Myntri Rangbah ka jylla naduh ka 19 tarik Rymphang, 1993 haduh ka 10 tarik Lber, 1998, bad hadien kata, u la ïoh bat biang ïa kane ka shuki tang na ka bynta 12 sngi ha u snem 1998.
Ka jingleh burom bakhatduh bad jingleit ontep ïa u Salseng kan long lashai ka sngi. Ha ka jingleh burom khatduh, yn don lang u Myntri Rangbah, u Conrad K Sangma, u Lamphang ka Dorbar Thawaiñ, u Thomas A Sangma, u MP ka Tura, u Saleng A Sangma nalor kiwei pat ki kynrem ki lyndan.
