Shillong, Nailar 16
Ar ngut ki rangïalehkai ka Jylla, u Manbhakupar Malngiang bad u Banlamkupar Rynjah, ki la shah jied hapoh ka kynhun ïalehkai phutbol U-17 jong ka ri India na ka bynta ki ar tylli ki jingïalehkai pyrshah ïa ka kynhun ïalehkai U-17 jong ka Indonesia, la pynbna ka All India Football Federation ha ka Sngi Thohdieng.
Kine ki rangïalehkai shapdeng kiba la don hapoh ka thup jong 24 ngut ki rangïalehkai ka ri, ki dang don ha Srinagar na ka bynta ban pynkhreh ïa ka lympung ïalehkai SAFF U17 Championship ka ban long ha Bhutan ha u Nailur bad ka AFC U17 Asian Cup Qualifiers ka ban long ha Thailand ha u Risaw mynta u snem.
Te kumta ban pynkhreh ïa kitei ar tylli ki lympung ïalehkai, katei ka kynhun hapoh ka jingïalam jong u Ishfaq Ahmed (coach) ka leit sha Bali na ka bynta ban ïashim bynta ha ki ar tylli ki jingïalehkai paralok pyrshah ïa ka ha ka 25 bad 27 tarik mynta u bnai.
U Manbhakupar u dei u rangïalehkai jong ka Lah Bet FC, kaba don ka jingïateh bad ka Bhaichung Bhutia Football Schools. U la don lypa ka jingshemphang ha ka kynhun ïalehkai ka ri, namar ba u la don bynta ha ka kynhun ïalehkai jong ka ri India kaba la rah ïa ka nam lahduh ha ka SAFF U-16 Championship pyrshah ïa ka Bangladesh ha u bnai Nailur jong u snem ba la dep.
Katba u Banlamkupar u dei u rangïalehkai ka Shillong Lajong FC bad u la ïoh rung sha kane ka thup ban ïalehkai na ka bynta ka ri ha ka bynta kaba shapdeng.
Kane ka lympung ïalehkai SAFF kaba don hynñiew tylli ki ri, kan ïakhun ha Bhutan naduh ka 18 tarik haduh ka 28 tarik Nailur. Ka India ka la don ha ka Group-A kaba kynthup ïa ka Maldives bad ka Bangladesh, katba ka Bhutan, Nepal, Pakistan bad Sri Lanka ki don ha ka Group-B.
Hadien ba la kut ka SAFF, kane ka kynhun ïalehkai ka ri kan bteng ban kilanmet ha Srinagar na ka bynta ka lympung ïakhun ïa ka AFC U-17 Asian Cup Qualifiers 2025 ka ban long ha u bnai Risaw mynta u snem ha Thailand.
Ki kyrteng ki 24 ngut ki rangïalehkai ka ri India ki long
Goalkeeper: Rohit, Aarush Hari & Suraj Singh Aheibam.
Defender: Lekhachandra Phairembam, Mohammed Kaif, Yaipharemba Chingakham, Usham Thoungamba, Chingtham Renin Singh, Abdul Salha, Karish Soram & Jodric Abranches.
Midfielder: Banlamkupar Rynjah, Mohammad Sami, Vishal Yadav, Manbhakupar Malngiang, Mohammad Arbash, Brahmacharimayum Sumit Sharma, Ngamgouhou Mate, Ningthoukhongjam Rishi Singh & Levis Zangminlun.
Forward: Prem Hansdak, Ahongshangbam Samson, Lairenjam Bharat & Hemneichung Lunkim.
