Shillong, Nailar 16
Ka Bethany Hospitals kan khang ïa ka Outpatient Department (OPD) ha kylleng ki shnat treikam jong ka ha Shillong, Nongpoh, Umsning, bad Byrnihat lashai ka sngi, 17 tarik Nailar, kum ka dak ban pyni ïa ka jingïatylli bad ka tnad ka koit ka khiah hadien ka jingjia kaba dang shen ha nongbah Kolkata.
“Kane ka rai ka long kum shi bynta jong ka jingsangeh treikam ha kylleng ka ri ne ka ‘Nationwide Withdrawal of Services’ ba la khot da ka Indian Medical Association (IMA), kum ka dak ka jingïatylli hapdeng ki briew kiba la pyntbit ha ka laiñ sumar nongpang ha kylleng ka ri kum ka jingïasnoh kti lang na bynta ka jingshngaiñ bad ka burom jong ki doktor,” l aong u nongaiktien ka Bethany Hospitals, Dr. Kyntiewlang Sanmiet ha ka kyrwoh khubor.
Nalor ka jingkhang ïa ka OPD; ki jaka sumar ka Bethany ki la pynlong ruh ïa ka jingthang mombati hynne ka janmiet ha ka por 6:00 baje ha phyllaw jong ki ha Shillong bad Nongpoh.
“Kane ka jingthang mombati ka long ka dak ban pyni ïa ka jingkyrshan ïa ki para nongsumar bad ka jingkhot jingwer na bynta ka jingïada bad ka burom ïa kito kiba synñiang la ka jingim ban pyllait im ïa kiwei pat,” ong u Dr. Sanmiet.
Haba kdew ba wat la ka OPD kan ym treikam lashai ka sngi, ka Bethany Hospitals ka ban jur ba baroh ki lad jingshakri ba kyrkieh (Emergency Services) kin treikam pura. Ki jaka sumar kin ïai bteng ban pynbiang ïa ki lad jingsumar ba kyrkieh sha kito kiba donkam.
“Ngi ïeng lang ha syndah bad ki para doktor ha Kolkata bad ha kylleng ka ri,” la ong u Dr. Sanmiet.
“Ki jingïashim bynta jong ngi ha kane ka jingïakhih ha ka ri baroh kawei bad ka jingthang mombati ka pyni ïa ka jingsngewkhia jong ngi na bynta ka jingshngaiñ bad jingmanbha jong baroh kito kiba la pyntbit ha ka laiñ sumar nongpang. Ngi kyrpad ïa ka imlang-sahlang ban sngewthuh ïa ka jingkongsan jong kane bad ban kyrshan ïa ngi na bynta ka jingshngaiñ bad ka burom jong kito kiba aiti la ka jingim ban pylllait im ïa kiwei,” u la ong.
Ka Bethany Hospitals ka pynsngew sha ïa ki nongpang bad ka imlang-sahlang baroh kawei ba kin ym sngew eiei ha kaba ïadei bad kane ka bynta bad ka kyrpad ïa ka jingkyrshan bad jingsngewthuh ha kum kane ka por.
Kumjuh, u Dr. R. Barman, Senior Medical Specialist, Woodland Hospital haba pynrem jur halor ka jingshah kynnoh pynïap dusmon ka doktor ha Kolkata ha ka 9 tarik Nailar, u la ong ba ka Woodland Hospital, Shillong ka pynpaw ka jingsngewlem bad ka IMA bad ka la rai ba ka OPD kan sangeh treikam lashai ka sngi, hynrei ki lad jingshakri bakyrkieh (Emergency Services), Emergency Laboratory Services bad ki Indoor Clinic kin treikam pura khnang ban shakri ïa ki nongpang.
Shuh shuh na ka liang ka Hospital ka kyrpad ïa ki paidbah ba kin ym sngew eiei bad pan jingkyrshan na ki ba bun balang ha kum kane ka por.
Ha ka 9 tarik Nailar, 2024, kawei ka samla pule ha kawei ka kolej pule doktor ha Kolkata, West Bengal, la lap ba ka la khlad noh ha Seminar Hall jong katei ka kolej.
Hadien ka jingpeit bniah, la pyntikna ba ka la shah thombor bad shah pynïap. Kane ka jingjia ka la ïalam sha ka jingbitar ha ryngkat ki jingïakhih ha kylleng ka ri ban dawa da ka jingtohkit kaba bniah halor katei ka jingjia.
Na ka liang ka Meghalaya Medical Services Association (MMSA) ha ka Sngi Thohdieng ka la pynlong ïa ka jingïakhih ‘Black Badge’ ban pynrem jur halor katei ka jingjia.
