Kyiv, Nailar:
U President ka Ukraine, u Volodymyr Zelensky ha kane ka taiew u la pynbna bad kam trai ba ka Ukraine ka la ioh ban synshar hi ia ki 74 tylli ki bynta jong ka thaiñ khappud Kursk bad ka Russia.
Kumjuh ruh u Lat jong ka nongbah Kursk, u la pyntip ba ka Ukraine ka la ioh knieh hi ia ka bor synshar ha ki 28 tylli ki bynta jong katei ka nongbah, kiba la shah kurup teng ha ki shipai ka Russia ha ki por ba la leit. Kumta, la ong ba lada kheiñ kyllum ia baroh kito ki bynta kiba ka Ukraine ka la ioh knieh biang bad synshar hi da lade ha kane ka por, ki la don kumba 74 tylli baroh.
Namarkata, u Zelensky u la ong ba wat hapdeng ka jingiakhun kaba eh ban tehlakam ia ka jingleit thombor jong ki shipai ka Russia, hynrei ka jingtrei shitom bad jingsei bor bah jong ka Ukraine kam shym la long sep-ei bad kane ka long ka jingjop ia ka Ukraine lada ka lah ban iai neh bad ban ïada ia u pud- u sam jongka na ka kti jong ka Russia haduh kaba kut jong ka thma.
