Shillong, Nailar 18
Ka Ri-iohlang Dhar ka la long ka kynthei kaba ar napoh ka Ri India ban shah jied kum ka Woman Assistant Referee ban ïoh pynïaid bad ïarap ha ka lympung FIFA U-17 Women’s World Cup.
Ka lympung FIFA World Cup jong ki kynthei mynta u snem kan long ha Dominican Republic ha Caribbean. Ïa ka kyrteng jong ka Ri-iohlang (34 snem) la pynbna da ka FIFA ha ka Sngi Thohdieng ha ka thup kyrteng jong ki 38 ngut ki nongpynïaid ïa katei ka lympung ka ban sdang naduh ka 10 tarik Risaw haduh ka 3 tarik Naiwieng.
Ka Uvena Fernandes ka la dei ka kynthei kaba nyngkong na India ban shah jied kum ka Woman Assistant Referee ha ka ban pynïaid ïa ka lympung World Cup kata ka FIFA U-17 Women’s World Cup ha u snem 2016 ha Jordan.
“Ka jingshah jied jong nga na ka bynta ka World Cup ka la long shisha kum ka burom bakhraw na ka bynta jong nga,” la ong ka Ri-iohlang ha ka ‘website’ jong ka All India Football Federation bad bynrap “Nga hap ban trei shitom ban lah ban pynurlong ïa ka jingkhmih lynti jong ka FIFA bad ba ngan buh ruh ha ka jingmut jingpyrkhat ba ngan don shato kum ka nongmihkhmat na India bad ngan leh lut ïa kiei kiei baroh ban kyntiew ïa ka lama ka Ri.”
Dang ha une u snem, ka Ri-iohlang, kaba trei kum ka pulit ha ka Meghalaya Police, ka la don bynta ha ka 2024 AFC U-17 Women’s Asian Cup kaba la long ha Bali, Indonesia, bad ka dei ruh kaba la don bynta ha kiba bun ki lympung ba heh jong ka pyrthei.
Ka sien ba nyngkong eh ba ka la shah jied kum ka FIFA Assistant Referee ka dei ha u snem 2018. “Naduh une u snem, nga la ïaid bun ki lynti ban kiew shajrong bad ha kaba nga la lah ban pynïaid bun tylli ki lympung ka pyrthei hynrei ka World Cup kan long kaba kham pher na baroh,” la ong ka Ri-ioh.
U Chairperson jong ka AIFF Referees’ Committee, u K Sankar u la ong, “Ha une u snem ha ka AFC U-17 Women’s Asian Cup ha Indonesia, ka Ri-iohlang ka la ïoh ban ïarap bad pynïaid ïa ka jingïalehkai jong ka semi-final bad ruh ha ka jingïalehkai ïaknieh kyrdan ba-lai (third-place play-off). Ka Ri-iohlang ka la lah ban pynpaw ïa ka jingtbit bad kane ka jingshah jied ka long ruh ka burom na ka bynta ka AIFF.”
