Pynsngew ka HBDRF ïa ka jingeh ki paidbah khappud sha u MP

La ïathuh ruh ïa ki jingshah lehbeiñ shah thombor ki paid Khasi Pnar jong kane ka thaiñ naduh ba ki la shah pynhap jubor sha Karbi Anglong Assam.

Jowai, Nailar 18

Ka Hynñiewtrep Border Dosputed Redressal Forum (HBDRF) ha ka 17 tarik Nailar ka la ïakynduh ïa u MP ka Shillong, u Dr. Ricky A. J. Syngkon ha Saint Clareth Parish Hall Phramer, West Jaiñtia Hills District ban pynsngew bad ai jingthoh halor ki jingeh ki paid nongshong shnong kiba shong basah ha ki jaka khappud bad ka jingïapynbeit pud hapdeng ka Meghalaya bad Assam.

Ha ka dorkhas ka Forum ka la ïathuh shaphang ka jinglong trai man trai jong ki Khasi Pnar ne ki Labang Nangphyllut halor ka khyndew ka shyiap u pud u sam na ki khana pateng bad ki jingthoh jingtar ne ki ‘Historical Fact’.

Ka Forum ka pynpaw ruh ïa ka jingsngewsih halor ka jingleh donbor jong ka Sorkar Assam ha ka por ba thaw ïa ki District Councils na bynta ki jaidbynriew ‘riewlum ka Jylla Assam ha ka snem 1949-50 AD da kaba khlad bad pynïasoh jubor ïa ka Elaka Labang Nangphyllut & Pangam Raliang (Block -1) sha United Cachar & Mikirs Hills ha ka jaka ban don bad ka United Khasi Jaiñtia Hills District Council kumba juh long naduh hyndai hynthai kulong kumah.

La ïathuh ruh ïa ki jingshah lehbeiñ shah thombor ki paid Khasi Pnar jong kane ka thaiñ naduh ba ki la shah pynhap jubor sha Karbi Anglong Assam. La kdew ruh ïa ki ‘Notification’ ne ki shithi Sorkar kaba ka Assam ka pynpaw ïa ka jingkubur ba ka la leh bakla halor ka ba pynhap jubor ïa kane ka Elaka shapoh United Cachar Mikirs Hills bad ïa ki shithi baka la phah sha ki District Council, ka United Khasi & Jaiñtia Hills bad ka United Cachar Mikirs Hills ba kin shimkhia ban pynbeit ne pyndep ïa ka kam ban pynphai biang ïa kane ka jaka sha United Khasi Jaiñtia Hills District.

Ka Forum ka pynpaw ruh ïa ka jingartatien ba ka jingïa pynbeit pud hapdeng ka Assam bad Meghalaya kan pynïoh ïa ka hok jong ki, kata ban pynphai biang ïa kane ka jaka sha Meghalaya.

Kumta ka Forum ka kyntu bad kyrpad ruh ïa u MP ba un sngewbha ban shimkhia bha ïa kane ka kam bad ban kren hapoh Parliament bad ruh bad ki heh ki haiñ ka Sorkar Pdeng na ka bynta ban ai ka jingbthah ïa kine ki ar Sorkar ban ym don kano-kano ka jingleh shiliang lane ka jingleh arsap haka ba pynbeit ïa u pud u sam.

U MP u la pdiang sngewbha ïa ka jingthoh ba la aiti da u Chairman ka Forum, u Bah Chandame Sungoh bad kular ruh ban shimkhia ïa kane ka kam.