Shillong, Nailar 19
Ka Green Heart Boxing Club ka la khur haduh 11 tylli ki takma ha kane ka lympung ïalehkai State Sub Junior bad Junior Boys & Girls Boxing Championship 2024 kaba dang shu dep kut kaba la long ha Indoor Sports Hall Mawlai Mawroh, Shillong ia kaba la sdang naduh 7 tarik haduh ka 9 tarik mynta u bnai.
Kine ki kynthup ïa ka 6 tylli ki takma ksiar, 2 tylli ki takma rupa bad 3 tylli ki takma rnong. kane ka klob ka la pynlong ka jingïakynduh lang ha ka 16 tarik mynta u bnai bad ruh ban pynkup burom ïa ki nongïakura kiba la lah ban pynpaw ïa ka jingtbit.
Te kumta ki dkhot jong ka Club ki ai khublei ïa baroh ki nongjop takma bad ki ai mynsiem ïa ki ba kin ai por kham bun ha ki jinghikai jong ki bad ban trei shitom na ka bynta ka lympung ban sa wan bad ban buh thong ban ïoh ïa ka rynsan takma ha ka Regional and National Competition.
Kiba la khur takma ksiar ha ka Sub Junior Division ki long u Kyrshan Swer (40-43kg), Banrapkupar Syiem (46-49kg), ka Dolcy Emilia Diengdoh (40-43kg) bad ka Badahun Syiemïong (35-37kg).
Ha ka Junior, ka Melbarine Swer (54- 57kg) ka la khur ïa ka takma ksiar lem bad u Mewanbanker Syiemlieh (57-60kg). Ka Melbarine ka la khur ruh ïa ka nam Best Boxer. Ïa ki takma rupa la khur da u Sambha Pathan Lyngshing (50-52kg) bad u Bashanlang Sylliang (57-60kg). Katba ïa ki takma rnong la khur da u Mangkara Nongtdu (54-57kg), Habanjop Syng -kli (48-50kg) bad u Oba-dia Mylliemngap (46-48kg).
