Islamabad, Nailar:
Katkum ki kaiphod ba la ioh lum da ka tnat wad bniah bad ka kynhun tohkit jong ki pulit ka Pakistan halor ka jingïa-dei hapdeng u nongseng jong ka Pakistan Tehreek-e-Insaf (PTI)- u Imran Khan bad u Director-General barim ka ISI u Lieutenant General (retd) u Faiz Hameed, la shem ba kitei ki 2 ngut ki nongialam, ki iadon jingiadei bad iadon kti lang ha ki katto- katne ki kam be-aiñ ba utei u nongialam ka seng PTI uba long u Myntri Rangbahduh barim jong ka Pakistan u la don kti ha ki por ba u dang long u nongialam jong ka ri ha ki snem ba la leit.
Katkum ki tyllong khubor, la ioh jingtip ruh ba u General Hameed u la pynneh ia ka jingiadei bad u Imran Khan lyngba ka kurim jong u Khan, ka Bushra Bibi. La kynnoh ba u Hameed u la ai jingtip lypa sha ka Bushra Bibi, ha kaba hadien kata kan sa pynsngew sha u Imran Khan, da kaba pyni kum ka jingpynshlur ba kynja Blei.
Kumta la ong ba katei ka jingtohkit ka la wanrah ia kane ka khubor ba phyla bad kaba ki pulit kim shym la khmih lynti wat hadien ba ki la kem noh ia utei u heh barim ka ISI, ha kaba la shem ruh ia ki jingiakren bad jingiadei kam jongki lyngba ka mobile iPhone kaba la ioh kurup na Chakwal bad kaba la pynpaw ïa ki jingtip ba bniah halor ka jingïadei jong u bad u Imran Khan.
