Jowai, Nailar 20
Ka lympung ïalehkai 3rd Division Football Tournament-4th Adelbert Laloo Memorial Trophy ba la pynïaid da ka West Jaiñtia District Sports Association (WJDSA) kan jam sha ka pre-quarter final ha ka 23 tarik hadien ba la kut noh ka jingïalehkai jong ka wat kaba nyngkong haka 20 tarik mynta u bnai.
Ha ka jingïalehkai kaba khatduh jong ka wat kaba nyngkong kaba la long ha madan Kiang Nangbah Stadium, Jowai, ka Da-I hi Mynsngat, ka Mulang Ïalong, ka Loompyrdi Iongpiah bad ka Luti Tuber Ïalong ki la buh jaka ïalade sha ka pre-quarter final.
Kiwei de kiba la rung sha ka pre-quarter final ki long ka Riatsaliya, Newhill, Phramer, Ïooksi Youth Welfare, Lumpyrtuh Mihmyntdu, SCSC Nonglatem, Myrjai, Mookymphad Mihmyntdu, Pasyih Cultural, Madan Thadmuthlong, Mookaswan Dongwah bad Mookyrdup.
Haba phai sha ka jingïalehkai jong ka wat kaba khatduh, ka Da i hi Mynsngat ka la pynliem noh ïa ka Nangbah Pohshnong da 3-0 kol. Ïa kine ki kol jong ka Da i hi Mynsngat la thep da u Depson Tokbi ha ka minit kaba 7 & 42 bad u Pyndap Pyrtuh ha ka minit kaba 45 min.
Ha ka jingïalehkai kaba bud, ka Royalpole Mihmyntdu ka la pynliem ïa ka Mulang Ïalong da 3-1 kol. Ïa ki kol jong ka Royalpole Mihmyntdu la thep da u Dahun Bang ha ka minit kaba 23 bad u Chanbor Krem ha ka minit kaba 35 & 47. Katba ïa ka kol jong ka Mulang Ïalong la thep da u Somit Pale ha ka minit 70.
Ha kawei pat ka jingïalehkai ka Loompyrdi Ïongpiah ka la pynliem ïa ka Saindur Mihmyntdu lyngba ka shi kol ba la thep da u Salan Passah ha ka minit kaba 45.
Ha ka jingïalehkai kaba khatduh, ka Luti Tuber Ïalong ka la pynliem ïa ka Pynthor Youth Social Welfare da 2-1 kol. Ïa ki kol jong ka Pynthor la thep da u Fredric Dhar ha ka minit kaba 26. Katba ïa ki kol jong ka Luti Tuber la thep da u Chalin Lyngdoh ha ka minit kaba 59 bad u Kam Lhuid ha ka minit kaba 64.
Ka jingïakhun pre-quarter kan long ha ka 23 tarik mynta u bnai hapdeng ka Riatsaliya pyrshah ïa ka Loompyrdi Ïongpiah ha ka por 12:30 baje mynsngi, ka Newhill pyrshah ïa ka Phramer ha ka por 2.30 baje nohphai sngi.
