Shillong, Nailar:
Ka Meghalaya SSA School Association (MSSASA) ha ka Lah Sngi U Blei ka la kren shai ba ka Riti Treikam ka seng kam shah satia ïa ka ban leit ai jingkyrshan ïa ka All Meghalaya SSA Non-Teaching Staffs Association (AMSSANTSA) kaba dang pynlong ïa ka jingïakhih shong kyllaiñ mungor mynta ha Madan Malki.
“Ka MSSASA ka dei ka seng kaba la pynrung kyrteng bad ka Sorkar. Katkum ka jingïoh jingtip jong ngi, kiwei pat ki seng ki dei ki bym pat pynrung kyrteng,” ong u President ka MSSASA, Sengkmie, Bah Aristotle C. Rymbai haba kren sha ki lad pathai khubor.
La ka seng kan kyrshan ne em ïa ka jingïakhih ka AMSSANTSA, u la ong ba ka seng (MSSASA) ka don ïa ka Riti Treikam kaba teh ïa ki dkhot jong ka, kata ïa kum kino ki jait jingïakhih kiba hap ai jingkyrshan bad ïa kum kino pat ki bym lah ban ai jingkyrshan.
“Da kaba shai nga kwah ong ba ngi kum ka seng ngi don ïa ka Riti Treikam, ki kyndon aiñ kiba teh ïa ngi, kaba mut ba ka jingleit ai jingkyrshan na ka liang ka seng ïa ka jingïakhih ki ‘Non-Teaching’, ka Riti Treikam jong ngi kam shah,” kren shai u Bah Rymbai.
Ha kawei ka liang, u la ong ba ka seng kam don eiei ban ong halor ka jingïakhih jong ka AMSSANTSA namar ki don ka hok ban ïakhih katkum ka jingpynkup bor da ka Riti Synshar ka Ri.
Haba phai pait sha ka jingdawa kyntiew tulop ïa ki nonghikai SSA, utei u nongïalam u la ïathuh ba naduh u Naitung jong u snem 2022 ha ka por ba pynlong jingïakhih ha Additional Secretariat, ka seng ka la ïaid shakhmat bad kane ka kam bad kam shym la shong kli kti ban buddien ïa ka haduh mynta.
“Ngi dawa na ka Sorkar ba ïa ka tulop jong ngi, dei ban pynkiew da kaba khmih katkum ka ‘Basic Pay’ nalor ki ‘Dearness Allowance’ katkum ka jingwanrah jingkylla ha ka rukom siew jong ka Meghalaya Services (Revision of Pay) Rules, 2018,” u la ong.
Ki nongtrei SSA hapoh ka shatri jong ka All Meghalaya SSA Non-Teaching Staffs Association (AMSSANTSA) ha 31 tarik Naitung ki la sdang ïa ka jingïakhih shong kyllaiñ mungor kaba khlem buh por namar ka jingbym shimkhia jong ka Sorkar halor ka jingdawa ban kyntiew ïa ka jingpynkiew tulop kaba 80% kaba la sahteng mynta la kumba 8 snem eiei.
Kumban shu kdew hangne, katei ka jingïakhih kaba la pynlong ha Madan Malki ka la ïaid la kumba 20 sngi eiei mynta.
