Jowai, Nailar:
Khnang ban pynskhem ban pynshongnia ïa ka jingïakhun ban pynphai noh ïa ki shnong Pnar hapoh Block-I na Assam sha Meghalaya, ka Executive Committee jong ka JHADC hapoh ka jingïalam jong u Bah Thombor Shiwat, ka la ai Sanad kaba pynkhamti ïa ka bor ka iktiar kaba pura kum ki Waheh Shnong jong ki 21 tylli ki shnong ha Block-I.
La sam ïa ki Sanad sha ki Waheh Shnong jong ki 21 tylli ki shnong ha ka jingïalang ba la pynlong ha kamra jingïalang jong ka shlem treikam ka JHADC ha ka Lah Sngi U Blei.
Kine ki 21 tylli ki shnong ki hap hapoh ka jingkhmih jong ka Elaka Labang Nongphyllut bad kum ban shu pynkynmaw, ka JHADC ka dang shu pynkhie im ïa ka Elaka Labang Nangphyllut hadien 45 snem da kaba thung ïa u Acting Doloi jong kane ka Elaka na ka bynta ban peit ïa ka shongsuk shongsaiñ bad ki jingdonkam jong ki nongshong shnong ba don hapoh ka Elaka.
U Bah Thombor u la aiti ïa ki Sanad sha baroh ki Waheh Shnong jong baroh 21 tylli ki shnong ha ka jingdon ryngkat jong u Executive Member ka JHADC u Bah Finelyness Bareh nalor kiwei kiwei.
Ha ka jingïakren bad u Bah Thombor hadien ba la wai ka jingïalang u la ïathuh ba hapoh kane ka Elaka Labang Nongphyllut la don 36 tylli ki shnong bad mynta ka sngi la ïoh ban ai pynkup bor ïa ki 21 ngut ki waheh shnong bad ïa kiwei pat ki waheh shnong ka JHADC kan sa pynkup bor ha ki sngi ban wan.
“Ka jingai sanad ïa kine ki shnong ka long halor ka nongrim ba ki kwah ban ithuh noh ïa ki, da ka sorkar Meghalaya,” la ong u Bah Thombor bad bynrap ba ka council kala ïaid lynti haba ïadei bad kane ka kam mynta la ar snem bad halor kane, kala wanrah ruh da ka rai hapoh ka ïingdorbar ban pynim bïang ïa kane ka Elaka.
“Ka jingpynbeit pud hapdeng ka Meghalaya bad Assam kam pat dep bad ngam pat ong ne pynthikna la kine ki shnong kin hap sha Meghalaya ne sha Assam namar ka kam pynbeit pud ka dang sahteng hynrei ka jingkwah jong ka council bad ka jingkwah jong ki 36 shnong ka long ba ka Elaka Langbang Nongphyllut kan wan sha Meghalaya”, la ong u Bah Shiwat.
U Bah Thombor u la pyntip ruh ba ki nongshong shnong katei ka Elaka kila kyntait lut ïa baroh ki kam pynroi ne kino kino ki jingïarap bala tyrwa da ka sorkar Assam bad kane ka pyni shisha ïa ka jingkut jingmut bad ka jingthrang jingangnud jong ki ban don sha Meghalaya.
U la ong ba ka council ka don ka jingkyrmen ba ka sorkar kan sngap ïa ka jingkwah jong kine ki 36 shnong namar hapoh katei ka Elaka la shong la sah tang da ki jaitbynriew Pnar.
