Nongpoh, Nailar 20
Kum shi bynta ban pynsah nam kyrpang ïa ka ïing ka sem jong u Bah Welin Roy Jyrwa (bam kwai ha dwar U Blei) bad u Tbn Dr. Friday Lyngdoh (bam kwai ha dwar U Blei) halor ka jingai sngewbha ka jongki ïa ka jaka, ka Balang Presbyterian Nongjri kaba dei ka nongpeit nongkhmih bad nongpynïaid jong ka Nongjri Presbyterian Secondary School ha ka Sngi Ba-ar ka la plie paidbah ïa u mot sah jingkynmaw ïa kine ki ar ngut ki rangbah ha ka jingïalang kaba la pynlong ha phyllaw jong ka skul ha Nongjri.
Ïa u mot ban pynsahnam bad kynmaw ïa u (L) Bah Welin Roy Jyrwa bad u (L) Tbn. Dr. Friday Lyngdoh, la wan ban plie paidbah da u nongaibuit jong ka sorkar jylla, u Bah DD Lapang, ha ka jingïadon lang u MLA ka Mawhati, u Bah Charles Marngar, uba dei ruh ha kajuh ka por u Chairman ka Managing Committee jong ka skul, u Bah James Born Jana, Chairman ka Nongjri Pyllun nalor ki nongpynïaid skul, nonghikai, khynnah skul lem bad ki bahaïing hasem jong u Bah Welin Roy Jyrwa bad u Tbn. Dr. Friday Lyngdoh.
Ka jingplie paidbah ïa utei u mot sah jingkynmaw da ka Balang Presbyterian Nongjri ka long ban pynpaw ïa ka jingsngewnguh sha ka ïing ka sem jong kitei ki ar ngut ki rangbah kiba la aiti ïa ka jaka ban tei ïa ka Nongjri Presbyterian Secondary School ban ai jingnang jingstad ïa ki khynnah jong ka thaiñ.
Haba ai jingkren, u Bah Lapang lem bad u Bah Charles ki la ai ka jingïaroh kaba kyrpang ïa ka ïing ka sem jong u Bah Welin Roy Jyrwa bad u Tbn. Dr. Friday Lyngdoh, kiba la kloi ban ai sngewbha bad ai kylluid mynsiem ïa ka jaka ban tei ïa ka skul kaba la nangkiew shaphrang.
Shuh shuh ki la pynpaw ïa ka jingangnud ban kyntiew kyrdan ïa kane ka skul na ka Secondary sha ka Higher Secondary bad ruh ban thaw sa ïa ka English Section lane ka skul kaba dei beit thik da ka ktien phareng. Halor kane ka bynta, na ka liang kitei ki nongkren ki la rai ban ïa shong pyrkhat bad ïamir jingmut lang lem bad ki nongpynïaid ka Balang Presbyterian Nongjri, ki nongpynïaid skul bad ruh bad ki bor shnong jong ka Nongjri ban pynurlong ïa kine kijingangnud na ka bynta ka jingmyntoi jong ki samla pule ka thaiñ hi baroh kawei.
