Shillong, Nailar:
U Myntri Rangbah ka Jylla, u Conrad K. Sangma ha ka Lah Sngi U Blei u la plie ïa ka Rongjeng Model Degree College ha Rongjeng, East Garo Hills ha ryngkat ka jingdonlang u Myntri ka tnad pule-puthi, u Rakkam A. Sangma, MLA, u Jim Sangma nalor kiwei-kiwei.
Ïa katei ka kolej thymmai la shna na ka jingïarap pisa lyngba ka RUSA 2.0 ha ka jinglut kaba ?12 klur. Ïa ka kolej la mang lyngba ka jingbei tyngka jong ka skhim na bynta ki ‘Under-Served District’ ha ki Jylla ka Thaiñ Shatei Lam Mihngi kumba la pynithuh da ka NITI Aayog.
Katkum ka khana samari jong ka snem 2011-2018, ka East Garo Hills District ka don ïa ka jingbun briew kaba 52,584 bad 54% ha ka jingdon kiba la nang la stad. Namarba ka dei ka ‘Unserved’ bad ‘Underserved’ distrik jong ka Jylla, ka distrik ka hap hapoh ka thup Educationally Backward District (EBD).
La kdew ruh ba ki samla pule ki hap ban leit shaduh Williamnagar ne wat ban leit sha kiwei pat ki distrik na bynta ki jingpule ba shajrong. Kumta, ïa ka Model Degree College bathymmai ha Rongjeng la tyrwa da ka jingthmu ban khmih ïa ka jingmih jong ki samla pule napoh ka distrik na bynta ki jingpule ba shajrong.
Ha ka jingplie ïa ka kolej, u Myntri Rangbah u la ong ba ka jingpynïeng ïa ka kolej ha Rongjeng ka dei ka jingseisoh jong ka jingkular u Purno Agitok Sangma (Bam Kwai ha Dwar U Blei) sha ki paidbah ka thaiñ.
“Ka dei ka jingphohsniew kaba la slem bah jong u nongïalam jong ngi, u Purno Agitok Sangma (Bam Kwai ha Dwar U Blei), uba la kular ban pynïeng ïa ka kolej hangne ha Rongjeng. Mynta, um don ryngkat bad ngi, hynrei ka jingkular ba u la khlei sha ki paidbah ka la seisoh,” u la bynrap.
Haba ai khublei ïa u Myntri ka tnad pule-puthi, MLA ka Rongjeng bad ka tnad pule-puthi, u Myntri Rangbah u la ong, “Ka ïingmala ka la dep pura, mynta pat ka dei ka jingkitkhlieh jong iwei-pa-iwei na ngi ban pyntikna ba ïa kane ka ïingmala yn pynkylla sha ka shlem ba khuid jong ka jingpule.”
Haba ban jur ba ka pule-puthi ka long ka mat kaba hakhmat eh jong ka Sorkar, u Myntri Rangbah u la ong, “Kane ka kolej ka dei ka nuksa kaba rit eh jong shibun kiei-kiei kiba ka Sorkar ka leh ban pynbha ïa ka pule-puthi hapoh ka Jylla. Kum ka Sorkar, ngin pyntikna ban ai ïa ka kabu kaba paka tam sha la ki samla pule.”
Haba pynbna ba ïa kane ka kolej yn ai kyrteng ha u Purno Agitok Sangma (Bam Kwai ha Dwar U Blei), u Myntri Rangbah u la ong, “U (P.A. Sangma) u don ka jingsngewtynnad kaba jan bad ka jingieid na bynta ki nongshong shnong ka Rongjeng. Kan long kaba biang eh ban ai kyrteng ïa ka kolej ha ka kyrteng jong u.”
Ka samoi pule jong kane ka kolej kan sdang mynta u snem da ka tnad pule ‘Arts’.
Shuh shuh u la bynrap ba ka jingmang ba donkam na bynta ka surok, ka um lem bad kiwei-kiwei ki jingdonkam ki bym shym don bynta bad ka ïingmala, la dep mang bad shen yn pyndep noh ïa ki.
