Shillong, Nailar 20
Ka lympung ïalehkai Asmita Khelo India Women’ Judo League na ka bynta ka East Zone ka la poi sha kaba kut ha ka lah sngi U Blei ha Indoor Stadium jong ka SAI Training Centre ha kaba ki nongïalehkai kiba na ka jylla Manipur ki la long kiba kham paw da kaba khur bun tylli ki takma, katba ka Meghalaya ka la khur katto katne ki takma.
Ha katei ka sngi la ïadon lang u MLA ka Nongkrem Constituency u Bah Ardent M. Basa-ïawmoit kum u kongsan ha kaba la ïadon lang u Dy. Director jong ka SAI, STC u T.S.Chavhan, ki dkhot nongkitkam ka Meghalaya Judo Associa-tion bad kumjuh jong ka Judo Federation of India.
Kumba ka paw ki la don lai ngut ki khynnah ïalehkai ka SAI Training Centre kiba kynthup ïa ka Realigrace bad ka Usefull lyngdong Nong-rum kiba la khur ïa ka takma rupa, katba ïa ki takma rnong la khur da ka Rimina Ingti, Khein-kor Padit, Nigamchi Sangma bad ka Joplin Kharkylliang.
Ki nongjop na kane ka jingïakob nalor ki takma bad ki syrnot, ki la ïoh ruh ba kin khung ïa ka song pisa kaba long T.3000 tyngka ïa kiba wan ba-lai, T. 5000 tyngka ïa kiba wan ba-ar bad T.7000 tyngka kiba wan ba nyngkong.
Nalor katta ki ‘thei ïalehkai ba ïoh ban bat ïa ka kyrdan kaba nyngkong bad ba ar ki la shah jied ban mihkhmat na ka East Zone sha ka National Women’ Judo League ka ban long shen ha Kerala mynta u snem.
