Shillong, Nailar 20
Ka Shillong Lajong FC ka la long ba la khreh ban iakhun pyrshah ia ka Emami East Bengal ha ka quarter final jong ka lympung ialehkai 133rd IndianOil Durand Cup ha ka sngi Balang ha ka por 7 bje janmiet ha JN Stadium, Polo.
Kane ka quarter final kaba nyngkong kan dei ruh ka jingiakhun hapdeng ka NorthEast United FC pyrshah ïa ka Indian Army FT ha Kokrajhar.
Ka Emami East Bengal ka la ïoh ban rung sha ka quarte final namar ba ka dei kawei na ki kynhun ba wan ba-ar na ka Group-A. Kane ka jingïakhun kanlong kaba kham itynnad namar ka Shillong Lajong FC ka dei ka kynhun kaba la wan ha ka kyrdan ba hakhlieh ha ka Group-F hadien ba ka la tam lyngba ka ‘goal difference’ ïa ka FC Goa.
Te kumta katei ka kynhun ba khlaiñ bor na Kolkata ka la hap ban wan iakhun ha kane ka nongbah hakhmat ki hajar ngut ki nongkyrshan ka Shillong Lajong na ka daw ka jingiakhih ha Kolkata. Te kumta ka East Bengal ka hap ban shaniah ha ki rangialehkai kiba ka dangshu dep soi thymmai kum u Madih Talal, u Dimitrios Diamantakos, u David Lalhlansanga bad u Jeakson Singh kiba la ioh ban ïoh ban mih madan ryngkat u Hijazi Maher, u Saul Crespo, u Mahesh Singh bad u Cleiton Silva.
Na ka liang u Carles Cuadrat u la ai khublei ïa ki nongkyrshan kiba la wan sha kane ka nongbah Shillong da kaba ong, “Na ka bynta ki nongkyrshan kiba wan ban ai jingkyrshan ka long kaba kongsan namar kan long ka jingïalehkai kaba itynnad”.
Ha kawei pat ka liang ka Shillong Lajong ka la pawnam bha ha kane ka jingïakhun da kaba la la lah ban pynliem ïa ka Tribhuvan Army FC bad ka Rangdajied United FC. Ha kane ka lympung u kapten ka kynhun Hardy Nongbri Cliff, u Phrangki Buam bad u Everbrigh-tson Sana ki la pynshongshit bha ïa ka jingïalehkai jong ki. Ki rangïalehkai na Brazil, u Daniel Goncalves bad u Marcos Rudwere Silva, kin long kiba kongsan bha na ka bynta ka kynhun ha kane ka jingïakhun.
U Coach ka Shillong Lajong u Jose Hevia u la ong, “Ngi la bishar bniah ïa ka jingïalehkai jong ka East Bengal na ki jingïakhun ba la dep. Kane ka jingïalehkai kan long kaba kham kongsan bha ïa ngi bad ngi donkam ban ïalehkai bha khnang ban pynurlong ïa ka jingjop.”
