Shillong, Nailar 20
Ka kynhun ki rangïalehkai Under-15 jong ka Nongjri Presbyterian Secondary School ka la jop ei da ka ‘walk over’ ha ka Sub-Junior jong ka 63rd Subroto Cup International Football Tournament 2024, hadien ba ka kynhun ïalehkai kaba na Madhya Pradesh ka la shah weng noh na ka daw ba ka la pynmih da ki khynnah ïalehkai kiba palat ïa ka rta ba la buh.
Kat kum ki khubor la ong ba ka Nongjri Presbyterian ka la don jingkyrmen ban rung sha ka quarter final namar ka la kamai 6 point na ki ar sien ïakhun bad ha ka jingïakhun kaba la long ha ka lah sngi U Blei ka la jop da Sri Lanka da 6-0 kol. Te kumta kane ka kynhun kaba na Ri Bhoi District ka hap ban pynkhreh ia ka jingiakhun kaba lai bad kaba khatduh pyrshah ia ka International School Sports Organisation (ISSO) ha ka sngi Balang ha ka por 2 baje janmiet.
Nalor katei ka kynhun kaba na Madhya Pradesh, kiwei pat ki kynhun kiba la shah weng noh ki long ka Nazareth Model High School (Assam), Nehru Public School (Bihar) bad ka Ultou Government Model High School (Manipur). Ïa kane ka la pynbna da ki bor pynïaid ka Subroto Mukerjee Sports Education Society, kaba hap hapoh ka jingkhmih jong ka Air Force Sports Control Board.
“Ki kynhun ba la kdew haneng la lap ba ki pynrung palat saw ngut ki nongïalehkai kiba la palat ïa ka rta ba la buh kaba la pynlong ïa ki kynhun ban shah weng noh”, la ong ka kyrwoh.
La pynlong ïa ka Skeletal Age Estimation Test katkum ki kyndon jong kane ka lympung bad ki kyndon ba la buh da ka All India Football Federation (AIFF).
Ïa ka jingmih jong ki jingïalehkai ba la ïalehkai ha ka sngi kaba nyngkong da kitei ki lai tylli ki kynhun ba la shah pynduh la pynbna ba kam don jingmyntoi.
La ap ïa ki kaiphod jong ki lai tylli kiwei pat ki kynhun kum na Mizoram bad Maharashtra khnang ban shim ïa ka rai katkum ki jingmih, ong ka kyrwoh.
Ha ka lympung ïalehkai jong u snem ba la lah, ki la don 16 tylli ki kynhun kiba la shah pynduh noh na kane ka lympung namar ba ki la pynrung da ki nongïalehkai kiba la palat ka rta.
