Ka jingïoh jong ka National People’s Party (NPP) ïa ki lai ngut ki MLA ka Congress haduh ban pynlong syndon ïa ka kum ka seng saiñpyrthei kaba lah ban synshar tang nalade ha Meghalaya ka don ruh la ki jong ki jingeh namar ha ka saiñ hima sima, lada khyndiat than ki MLA ha ka seng ruh ka jynjar, bad ynda la ïa bun palat ruh ka wanrah ïa ki jinglynga. Watla ka jingdon jong ki 31 ngut ki MLA ha ka NPP kan pynthikna, lada ym jingkylla da kumwei pat, ba u Conrad K Sangma un ïoh ban synshar haduh ba kut jong ka san snem, kata, haduh u snem 2028, hynrei ki lah ban mih ki jingeh namar ki MLA kin wan sha u ban dawa na ka bynta ki kam bapher-bapher la ki dei na ka bynta shimet ne na ka bynta ki paidbah ki konstitwensi jong ki. Yn pynhun tang ïano? Yn peit tang ïano? Yn ai skhim ba heh tang shano? Yn pynduh ne yn pynïoh tang ïano? Baroh kiba donkam suda. Hangne ka lah ban mih ka jingïaknieh hapdeng ki MLA na ka NPP ïa ki kam pynroi.
Ka lah ruh ban mih ka jingdawa napoh ka NPP ban weng noh ïa ki Myntri sorkar kiba dei na kiwei pat ki seng saiñpyrthei bad ban thung bujli da ki MLA jong ka seng. Watla u Conrad bad kiwei pat ki nongïalam ki la kren shai ba ka NPP kan bteng ban ïatreilang bad ka BJP, UDP, HSPDP bad ki arngut ki MLA khlem seng kiba la don naduh ba thaw ïa ka sorkar, hynrei namar ba ka samoi treikam ka dang sah sa lai snem tam, ki lah ban mih ki jingdawa ba dei ban ai Myntri beit tang ïa ki MLA kiba don ha ka seng NPP. Na ka liang u Conrad, ngi sngewthuh, ba un ym lah ban weng ïa ka BJP namar kane ka seng ka bat ïa u lakam jong ka jingsynshar ha Delhi. Kumba ngi tip, ki jylla ki barit ki donkam beit ïa ka jingkyrshan pisa na ka Sorkar Pdeng, bad lada u pynhap noh ïa ka BJP na ka shuki Myntri, kathie ka Sorkar Pdeng ka lah ban ym sngewtynnad.
Ïa kiwei pat ki seng kum ka UDP bad HSPDP, u Conrad um don jingeh satia ban weng noh ïa ki namar ki dei ki seng kiba kham rit. Tangba ka jingeh kan wan lada kine ki seng ki rai ban shong noh ha ka liang pyrshah lada ki shah bret na ka kynhun Meghalaya Democratic Alliance (MDA). Ha ka saiñpyrthei, ka liang synshar kam ju kwah ba ka liang pyrshah kan bun paid ne khlaiñ namar kin mih bun ki jingeh khamtam ha ka por ba long ka Dorbar ki MLA. Ngi ïohi ruh ba kiba kham bun na ki paidbah ki noh mynsiem sha ki MLA ne ki seng saiñpyrthei kiba shong ha ka liang pyrshah bad ym ha ka liang synshar. Namarkata, imat u Conrad bad kiwei pat ki nongïalam ka NPP ki la sngewthuh lypa ïa kane, bad ka la pynbor ïa ki ban pynpaw paidbah ba kin bteng ïa ka jingïatreilang bad kitei ki seng.
Sa kawei ruh ngi ïohi ba ka jingleit pynïasoh jong ki lai ngut ki MLA ka Congress ka la wanrah ïa ka jingshah beiñ shah khoh khamtam ha ki rynsan ‘Social Media’ kiba dei ki rynsan paidbah. Ngi sngewthuh na kine ki jingkynthoh ba kiba bun kim sngewtynnad ïa ka jingleit rung NPP jong kine ki MLA watla ki MLA ki la pynpaw ba ki la leit na ka bynta ban ïoh jingmyntoi ki paidbah, konstitwensi bad ka jylla. Hynrei kiba bun kim pdiang satia ïa kine ki daw ba la ai da kitei ki MLA bad namarkata, ki la shah kynnoh laiphew jait laiphew skit. Kan shong ha kine ki MLA kumno kin leit pynshai sha ki nongthep ‘vote’ kiba la kyrshan bad pynjop ïa ki ha ka ilekshon ha u snem ba la lah. Kine ki MLA ki donbok ba ka samoi treikam ka dang sah sa lai snem tam, bad kin dang ïoh por ban pynshai bad pynsngewthuh sha ki paidbah jong ki. Lada dei ba ka ilekshon ka la don hakhmat, kan jynjar ïa ki ban pan ïa ka jingkyrshan na ki paidbah nongshong shnong kiba la ju kyrshan na ka por sha ka por.
Ki jingkylla ha ka saiñ hima sima ha kane ka jylla ki lah ban nang mih na ka por sha ka por tad haduh ban da dei biang ka aïom ban jied MLA ha u snem 2028. Ki paidbah ki la pyndep ïa la ka kamram ha u snem 2023 da kaba leit thep ‘vote’. Don kiba sngewsih ba ki la shah shet kylla noh ha la ki jong ki MLA, bad don ruh kiba kmen da ka jingkhmih lynti ba kin ïoh ïa kita ki kam pynroi. Kito kiba kwah ban kput ïa ki MLA kiba la kyntiap seng kin hap ban ap haduh u snem 2028 ynda la wan ka ilekshon bathymmai. Kiwei pat kin hap ban ïaleit tur sha kita ki MLA ban pan ïa ki kam pynroi kumba ki la kular ha ka por ba ki la leit khroh ‘vote’.
