Shillong Nailar 21
U Myntri ka tnat bording u Abu Taher Mondal ha ryngkat u MLA ka Mawkynrew u Bah Banteidor Lyngdoh ha ka Sngi Balang ki la leit ban khmih ïa ka Sub-Station 33KV kaba don ha shnong Umtong bad kane ka Sub-Station kan long ka jingmyntoi ïa bun tylli ki shnong kiba don kham sharum na ka shnong Mawkynrew ha kaba ka jingsam bording ilektrik kan long noh kaba kham biang namar ka jingpyntrei ïa kane ka Sub-Station ruh la jan dep artad.
Kane ka jinghiar u Myntri ka tnat bording ka dei hadien ba u MLA ka Mawkynrew u la pynsgew ha u ïa ka jingud jingnam ki paidbah namar ka jinglip khah-khah ka bording ilektrik ha ki shnong bapher bapher ka thaiñ Mawkynrew khamtam ha ka por slap.
Ki paidbah ha bun tylli ki shnong ki ju ud ba tang shu hap slap ka ilektrik ka la lip bad don ka por ba ym ju don bording da ki taïew bad ki bnai.
Hynrei kane ka jinghiar u Myntri sha Umtong ha ryngkat u MLA ka pynthikna ba shen ka jingmad jingeh ki paidbah yn sa lah ban weng noh namar ka jingpyntrei ïa ka Sub Station ha Umtong la jan dep artad.
U Myntri ha kane ka jingleit jurip ïa ka Sub-Station u la lap ba ka jingpyntrei ka sah sa tang khyndiat.
U Myntri u kyrmen ba ynda la treikam kane ka Sub-Station, kan long ka jingmyntoi ïa bun tylli ki shnong kiba don kham sharum na ka shnong Mawkynrew ha kaba kin ïoh ïa bording ilektrik kaba yn nym don jingthut shuh.
Kumba long mynta, ka bording ilektrik ha thaiñ Mawkynrew ka dei kaba pynwan na thaiñ Mawryngkneng bad kane ka la khia bha bad ym lah ban pynbiang ïa ka jingdonkam bording. La ong ba bunsien ki shnong ha thaiñ Mawkynrew ki ïoh bording tang khyndiat kynta ha ka shisngi. U BDO ka Mawkynrew C&RD Block, u Bah G Dhar, ki ophisar ka MeECL, ki nongïalam shnong lem kiwei pat ki rangbah ki la donlang ha kane ka jingleit jurip u Myntri ïa ka Sub-Station hapdeng ka jinghap u slap uba jur.
U Mondal u la ong ba kane ka Sub-Station kan treikam noh kloi katba lah namarba ka jingtrei ruh ka sah sa tang katto katne ban pyndep.
U la ai khublei ruh ïa u MLA Bah Banteidor Lyngdoh uba la shimkhia ban pynkloi ïa ka jingpyntrei ïa kane ka Sub-Station ha kaba u la khot ruh ïa u kum u Myntri ban peit ïa kane ka Sub-Station. U Myntri u la ai jingïaroh ruh ïa ka jingïatreilang jong ki Dorbar Shnong ha katei ka thaiñ.
U Myntri u la ong ba watla ka don ka jingduna nongtrei ha kane ka Sub-Station hynrei un ïakren bad ka Sorkar ban pynbun ïa ki nongtrei khnang ban lah pyndep kloi.
Ha kane ka sngi, u Mondal uba dei ruh u Myntri ka tnat Community and Rural Development, u la leit ban jurip ia ka jingshna thymmai ïa ka shlem treikam u BDO ka Mawkynrew C&RD Block ha kaba ka jingpyntrei ka dang ïaid shaid shaid.
