Washington, Nailar:
U Secretary of State jong ka US- u Antony Blinken ha ka Sngi Nyngkong u la kyntu ïa ka Hamas ba kan pdiang ïa ka jingtyrwa pynïasoh jong ka US naka bynta ka jingïasoi soskular ban sangeh noh ia ka thma bad ban pyllait ïa kito kiba ka la rahbor sha Gaza namar u la iathuh ba ka Israel ruh ka la mynjur ban sangeh noh ia ka thma lada ka Hamas ka kohnguh ia katei ka jingdawa jong ka Israel ban pyllait noh ia kitei kiba ka Hamas ka la rahbor baroh shi katta.
Namar u la ong ba lehse kane ka lad ban poi sha ka jingiakren iasuk kan long ka sien ba khatduh ban ailad ia ka Israel bad ka Hamas ba kin ioh ban im suk- im saiñ biang kumba ju long baroh shi katta.
Ka jingiakren ha Qatar ha ka taiew ba la dep ka la sangeh noh khlem da don kano- kano ka jingpynpaw, hynrei la khmih lynti ba ka jingiakren kan sdang biang mynta ka taiew bad ba yn ioh ruh ban pynshong nongrim ia ka jingtyrwa jong ka US ban klet noh ia ki jingduna bad ki jingiathud hapdeng ka Israel bad ka Hamas baroh shi katta.
U Blinken ha katei ka sngi u la iathuh ba ha ka jingiakynduh jong u bad u Myntri Rangbahduh ka Israel – u Netanyahu, u la pynthikna ha u ba ka Israel ka la pdiang ia ka jingtyrwa ban sangeh thma noh hynrei na ka liang ka Israel ruh, ka la kyntu bad dawa ia ka Hamas ba kan pyllait noh ia kito kiba ka la rahbor baroh naduh ba sdang jong ka thma.
Kumta, u Blinken u la ong ba mynta ka shong sa tang ha ka Hamas ba kan shim ia ka rai kaba khatduh bad ka dei ka kamram jong ka Hamas ban leh kumjuh kumba ka Israel ka la kohnguh iaki jingkren bad jingkyntu jong ka US.
Namar la ong ba da ka jingtrei shitom bad ka jingiasnoh kti lang jong ki ri bapher kum ka America, Egypt bad Qatar, ka US ha kane ka sien ka la lam khmat ban wanrah noh ia ka jingiasuk hapdeng ka Israel bad ka Hamas bad ban soi ruh ia katei ka jingiamynjur ban sangeh noh ia ka thma.
Katba, na ka liang jong ka Hamas, ka la kynnoh ba dei u nongialam ka Israel hi- u Netanyahu uba la pynthut bad pyndkut noh ia ka jingpyrshang jong ki nongpyniasuk ban pyn urlong ia katei ka jingthmu, naka bynta ka bha- ka miat lang jong baroh arliang ri bad kumjuh ruh na ka bynta ka jingshngaiñ jong ka pyrthei baroh kawei khamtam hapoh ka thaiñ Middle East.
Kane ka thma hapdeng ka Israel bad ki lehnoh Hamas hapoh Gaza ka la sdang naduh ka 7tarik Risaw jong u snem 2023 ba la dep, ha kaba ki riewkieng suloi jong ka Hamas ki la mareh sha shiliang u pud u sam ka Israel bad ki la pyniap dusmon ruh haduh 1,200 ngut ki briew bad ha kajuh ruh ka por ki la rahbor palat kumba 250 ngut ki briew na Israel, kynthup ia ki nong Israel bad kumjuh ruh kito ki nongleit shangkai pyrthei lane ki paidbah jong kiwei pat ki ri kiba shu leit shong shipor ne leit sah kai ha Israel naka bynta ki kam ki jam jongki.
