Rawalpindi, Nailar:
Ka tnat shipai ka Pakistan ha ka Sngi Ba-ar, ka la pyntip ba ka la seisoh ha ka jingpyrshang pynher ia u ‘namding Ballistic Missile ‘Shaheen-II’ jongka, uba lah ban pynbthei na sla khyndew.
Ha katei ka sngi, la ong ba la ai jinghikai ïa ki shipai katei ka ri , ban pynshisha ïa ki kyndon bapher- bapher jong ka jingstad bad ka jingbishar bniah ïa ka jingtreikam jong ki sub-system bapher bapher ba la pynrung na ka bynta ban pynbha bad pynkhlaiñ ia ka jingiada naka bynta ki jingma kiba lah ban wan lynshop ia ka ri ha ki sngi ki ban wan.
Hynrei, na ka liang ka tnat shipai ka Pakistan kam shym la batai bniah ne pynpaw paidbah eiei shaphang katei ka kam kaba ki la lah ban pynurlong bad ban ai jinghikai ia ki shipai katei ka ri halor ka jingpynher ia kitei ki jait ‘namding, khnang ban pynsuk ia ki ha ka por ba jia ka thma ne kino- kino ki jingjia ba ka ri ka hap ban iakhun pyrshah ia ki nongshun.
