Jowai, Nailar 21
Ka Nangbah Dukhu bad ka Caroline Colony ki la khur ïa ka jingjop ha kaba sdang ïa ka lympung ïalehkai 2nd Division Football Tournament-7th Debo Shullai Memorial Trophy ba la pynïaiad da ka West Jaiñtia District Sports Association (WJDSA) ha ka sngi Balang ha Kiang Nangbah Stadium, Jowai.
Ha ka jingïalehkai kaba nyngkong, ka Nangbah Dukhu ka la pynliem noh ïa ka Madan Kynsaw Mookyndeng da 3-1 kol. Ïa ar kol la thep da u Shanlang Thubru ha ka minit kaba 3 & 46 bad ïa kawei pat la pynbud da u Rimi oo Sungi ha ka minit kaba 49. Na ka liang ka Madan Kynsaw Mookyndeng ka la lah ban pynphai kyla lyngba u Dangri Phawa ha ka minit kaba 59.
Ha ka jingïalehkai kaba bud, ka Caroline Colony ka la jop da 2-0 kol ïa ka Mupliang. Ïa kine la thep da u Gabrial Lakashiang ha ka minit kaba 3 bad 63.
Kane ka lympung kan bteng biang ha ka sngi Palei ha kaba ka Mukhla Umlangshor kan ïakhun pyrshah ïa ka NSA ha ka por 12 baje mynsngi, katba ka Shilliang Raij ïa ka Maitsha-phrang Mootyrshiah ha ka por 2 baje nohphai sngi.
