Nongpoh, Nailar 21
Ki nongïalam ka Umsning Block Congress Committee (UBCC) ha ka jingïalang kyrkieh kaba la pynlong ha ka sngi Balang ha Nongthymmai Umsning, ki la pynpaw ïa ka jingsngew bynñiaw kaba jur halor ka jingleit pynïasoh kaba kyndit kyndit u Dr. Celestine Lyngdoh, MLA ka Congress na Umsning Constituency sha ka National Peoples Party ha kine ki khyndiat sngi ba la dep.
Ha kane ka jingïalang la wan ban don ryngkat naduh u Adhoc President ka Ri Bhoi District Congress Committee, u Bah MG Kharshanlor, u President ka Umsning Block Congress Committee, Bah Rocky A Marweiñ lem bad kiwei de ki nongkitkam na ka Block bad ki Unit bapher bapher kiba hap hapoh ka Umsning Constituency. Haba kren sha ki lad pathai khubor, u Bah Rocky A Marweiñ, u la ong ba ka jingleit pynïasoh u Dr. Celestine Lyngdoh sha ka NPP, kam dei satïa kaba u la pyntip ne kynjoh ktien sha ki para nongkitkam ka Congress, hynrei ka dei ka rai shimet jong u.
U Bah Marweiñ u la ong ruh kumba long mynta, ka Congress ka dang neh bad dang khlaiñ ha Umsning Constituency kumba ju long namar baroh ki nongkitkam jong ka seng ki dang ïai neh hi bad ka Congress.
U Bah Marweiñ, u la phla ruh ba u Dr. Celestine Lyngdoh ha ka jingïalang jong ka seng ha kine ki khyndiat sngi ba la dep u la pyntip ba un leit tang ban kyrshan ïa ka sorkar MDA 2 na ka bynta ban ïoh ïa ki skhim pynroi ban pynbit pynbiang ïa ki jingdonkam jong ki paidbah, hynrei u khlem ïathuh pat ba un leit pynïasoh syndon sha ka NPP.
