Shillong, Nailar 21
Ka Paralympic Committee of India (PCI) ka la thung ïa u Satya Prakash Sangwan kum u Chef de Mission (CMD) jong ka kynhun ïalehkai ka ri India na ka bynta ka Paris Paralympic 2024 ka ban sdang naduh 28 tarik mynta u bnai haduh 8 tarilu Nailur.
U Sangwan, uba dei ruh u Vice-President jong ka PCI, u long uba la don ka jingshemphang kaba la palat shisnem hapoh ka jingïakhih jong ki Paralympic.
Kum u CMD, u Sangwan un ïalam ïa ka kynhun ïalehkai kaba heh tam jong ka India kaba don 84 ngut ki para-athlete kiba ïakhun ha ki 12 tylli ki jait jingïalehkai. Ka bynta jong u kan long kaba kongsan bha ban pynthikna ba ka kynhun shipai India kan ioh ia ka jingkyrshan bad jingpyniaid kaba ka donkam ban pawnam ha ka pyrthei.
“Ka kyrdan jong u Chef de Mission ka dei ka kam kaba bun rukom kaba donkam ïa ka jingïalam, ka jinghikai, bad ka jingthmu ba thymmai. U Sangwan un hap ban shim ïa ka jingkitkhlieh ban peit ïa ka jingtreikam kaba suk jong ka kynhun nongmihkhmat jong ka ri, ban pynroi ïa ka jinglong kaba bha bad kaba kyrshan, bad ban ai mynsiem ïa ki nongïalehkai ban leh ïa kaba bha tam na ka bynta ka ri,” la pynpaw ka PCI ha ka kyrwoh ha ka sngi Balang.
Haba pynpaw ïa ka jingsngewnguh halor ka jingthung kam, u Sangwan u la ong, “Ka long ka burom kaba khraw ban shah pynkhamti ha nga ïa kane ka kam. Nga thrang ban pynthikna ba ki nongïalehkai jong ngi kin ïalehkai bha bad ban pynlong ïa ka India kaba sngew sarong ha ka Paralympics.”
Haba kynthoh halor ka jingthung ïa u Sangwan, u Devendra Jhajharia, President ka Paralympic Committee jong ka Ri India u la ong, “U Satya Prakash Sangwan u dei u bynta ba kongsan jong ka Paralympic Committee jong ka Ri India la palat shiphew snem. Ka jingaiti bad ka jinglong nongïalam jong u ka la long barabor ka jingai mynsiem ïa ki nongïalehkai jong ngi. Ngi ngeit skhem ba hapoh ka jingïalam jong u kum u Chef de Mission, ka kynhun jong ngi kan ïoh ïa ka jingjop kaba khraw ha ka Paris Paralympics 2024.”
Ka jingshemphang bad jingïeid jong u Sangwan ïa ki jingïalehkai ‘para-sports’ ka la pynlong ïa u kum u briew uba donburom ha ka imlang sahlang. Ka jingthung jong u kum u Chef de Mission ka long ka sakhi ïa ka jingaiti lut jong u ban kyntiew bad kyrshan ïa ki nongïalehkai (para-athletes) ha ka ri India.
