Shillong, Nailar 21
Ki paidbah ki la ïoh ban shad da ka jingkmen khlem jing-sangeh hadien ba ka Shillong Lajong FC ka la ïoh ban rung sha ka Semi-Final da kaba pyn -liem ïa ka Emami East Bengal kaba dei ka team kaba don ha Indian Super League da 2-1 ha jingïalehkai Quarter-Final jong ka Durand Cup kaba la long ha ka Sngi Balang ha madan JN Stadium Polo, Shillong.
Katkum ka jingpynbna ha madan, ki paidbah kiba la poi ha ki jaka shong ha katei ka madan katkum ka tiket ba la dep die ka long palat 14,900 ngut.
Haba phai sha kane ka jingïalehkai ka la pynkyndeh mynsiem ïa ki nongkyrshan ka Shillong Lajong namar mar shu sdang ka jingïalehkai kata ha ka por 7 minit 44 second u rangïalehkai na Lajong u Rudwere u la ïoh ban thep ia ka kol ka banyngkong.
Hadien katto katne por ba la ïaid ka kyllamiet, ka East Bengal ka la ïoh ban pynphai ïa ka kol ha ka por 76 minit ba la thep da u Nandhakumar Sekar. Kaba la pynkmen ïa ki paidbah ka dei ha ki minit shwa ba ka jingïakhun kan kut noh ha kaba ka Shillong Lajong ka la ïoh ban pynphai da kaba thep kol ha ka minit kaba 84 da u Figo Syndai.
Ha kane ka jingïalehkai la ïohi ba ki paidbah kiba wan na nongkyndong ki la hap ban leit phai thylli namar ka jingbym don tiket shuh naduh dang step namar ba la bun kiba la dep thied lut na ka rynsan Online.
Nalor ba ka tiket ka la lut, ki la don pat sha kiba shim kabu ha kaba ki la die ïa ka T.200 ïa ka tiket kaba T.100 katba ïa ka tiket kaba T.200 ki die T.500. Hynrei ynda la kham jan ka por ban sdang ka jingïalehkai, ki la don ruh kiba tyrwa haduh T. 1,000 ïa ka tiket kaba T. 100. Tangba ki don kiba la wan najngai kiba la thied peit ïa kane ka tiket tang ban ïoh peit kai, hynrei kito kiba la wan bun ngut ki khlem lah ban thied shuh.
Ka long ka sien banyngkong ba ka Shillong Lajong kan rung sha ka Semi-Final jong ka Durand Cup ha kaba kan hap ban ïakynduh ïa ka Northeast United FC ha ka 25 tarik Nailar.
