Guwahati, Nailar:
Ki la don kumba 17 ngut ki nong Bangladesh kiba la rung sha Assam bad kawei napdeng kine ka la shahkem noh, la ïathuh ki pulit. Ïa kane kaba la shahkem la phah leit phai noh sha ka ri ba ka wan bad ka la phla ba kumno ma ka bad kiwei pat ki la rungtuh sha kane ka jylla.
U Myntri Rangbah jong ka Assam u Himanta Biswa Sarma, ha ka jingpyllait khubor jong u lyngba ka rynsan X, u la ong ba ka nong Bangladesh kaba la shahkem ka dei ka nongshong shnong jong ka Dhaka, ha kaba la ithuh ïa ka. “Ïa kane ka briew kaba na Dhaka la aiti noh sha ki bor ba dei khmih jong ka ri Bangladesh. Hashwa kane ka la shahkem ha Dhubri ha ki pulit ka Assam,” u la thoh. Kane ka briew ka la rung ha ki bynta jong ka ri India hashwa, kata ha ka 18 tarik, Nailar ha Sukchar, kaba don ha South Salmara District da ka kjat, hadien ba ka la shong da kiba bun tylli ki bos bad ki lieng ha palat 24 kynta. “Hadien ba ka la ïoh jaka sah ha kawei ka ïing kaba don ha Sukchar, ka la bteng ban leit sha Dhubri da ka lieng ha kaba ka la rungtuh. Ka jingpyntreikam ka dang ïaid shakhmat khnang ban ïohkem sa ïa kiwei pat ki nongïarap bad ki nongrungtuh,” la bynrap u Sarma.
Kumba la ïathuh da ki pulit, la ong ba kane ka briew ka la phla ba ka la rung beaiñ sha India da ka jingïarap jong ki nongïarap ban pynrung tuh ha ryngkat ki 16 ngut ki nongshong shnong jong ka Bangladesh.
