Shillong, Nailar 21
U Symbud Myntri Rangbah ka Jylla, Bah Prestone Tynsong ha ka Sngi Balang u la kren shai ba ka Sorkar Meghalaya Democratic Alliance (MDA) kaba la thaw hapoh ka jingïalam ka National People’s Party (NPP) kan pyndep pura ïa ka samoi treikam jong ka.
“Kynmaw tang kawei, na ka liang jong ngi, lada ngi la ïoh makna ïa ka jingbun paid ruh, ka kular ba ïateh jong ngi ka long ba…ha ka kyrteng ka MDA, ngin pyndep ïa ka samoi treikam – kata kaba nga kwah ban kren da kaba shai kdar,” ong u Bah Tynsong haba kren sha ki lad pathai khubor.
U la ban biang ba ka kular ba ka NPP ka ïateh ka long ba ïa ka MDA kaba la thaw, yn pynkut pura ïa ka samoi treikam jong ka.
La kan don ne em ka jingkylla ha ka Kynhun Myntri, u Symbud Myntri Rangbah u la ong, “Nga dei u President jong ka seng, ngam tip…ïa kata phi lah ban kylli na u Myntri Rangbah, lada u don lehse, kata ka dei ka bor jong u Myntri Rangbah ban ong ba lehse ïano ban pynrung Myntri, lane ïano ban ai tnad treikam aïu, lane kumno lehse ban ong to sngewbha phi, ngin pynshongthait…kata baroh kam dei ka kam jong ka seng hynrei ka kamram jong u Myntri Rangbah.”
Kumban shu kdew hangne, 3 ngut ki MLA ka Congress ba kynthup ïa u Dr. Celestine Lyngdoh (Umsning), Bah Charles Marngar (Mawhati) bad Bah Gabriel Wahlang (Nongstoiñ) ki la pynïasoh noh ha ka NPP ha ka Lah Sngi U Blei.
Ha kajuh ka por, haba kylli la ka seng ka don jingthmu ne em ban wanrah ïa ka MP barim, ka Agatha K. Sangma lada u MP (ba mynta) ka Rajya Sabha, Dr. W.R. Kharlukhi un ieh noh kam hashuwa ban kut ka samoi treikam jong u ha u 2026, u Bah Tynsong u la kyntait ïa kane bad ong ba kam don eiei kaba kum kata.
“Em, kam don kum kata, nga kum u President jong ka seng, kam don eiei kum kata. Ngam tip kata ka khubor naei ka mih, hynrei kumba nga ong hi, kam don eiei kaba kum kata ,” u la ong.
Haba kylli, u la bynrap, “In ieh noh kam na bynta kaei, ba leh aïu in hap ieh noh kam…ïa kata te ngam tip, lada don kum kata ka kam shimet, jingeh shimet, kata ka ïaid da kumwei. Tangba ka dei ban ïaid ha ka rukom kaba dei – dei ban phah ïa ka jingpyntip ne ka jingkyrpad ne ka shithi lehse sha ki bor ba dei khmih jong ka seng, hangta ngi lah ban ïakren.”
