Shillong Nailar 22
U nongïalam ka Congress ha ka ri, u Rahul Gandhi u la bthah ïa ki nongïalam ka Congress ha kylleng ki Jylla ban nym pdiang shuh ïa kito kiba la phet bad kiba ibeiñ ïa ka Congress, hynrei donkam ban wad briew thymmai khamtam ki samla kiba la nang la stad bad ai jinghikai ruh ïa ki.
Ïa kane la ïathuh da u President ka Meghalaya Pradesh Congress Committee (MPCC) u Bah Vincent H Pala haba batai shaphang ka jingïakynduh jong ki nongïalam ka Congress na kylleng bad u Rahul dang shen, uba la kren khia bha ba ym dei ban phaikhmat sha kito kiba la phet noh na ka seng, hynrei dei ban wad thymmai khamtam ki samla kiba la don jingnang jingtip ha ryngkat ka jingai jinghikai ïa ki kum ka jingpynkhlaiñ bad pynkupbor ïa ki.
“Kumta ngi la rai ban jied kumba 60 ngut haduh 70 ngut ki samla ki ban leit sha ka jingshah hikai ha kam nongïalam jong ka seng,” la ïathuh u Bah Pala haba jubab ïa ka jingkylli la ka jingkhang ka Congress ka plie ne em ïa kito kiba la phet bad shet ïa ka Congress ba kin dang wanphai biang sha ka seng ha ka Sngi Palei.
Haba kylli la ka jingphet ki MLA ka Congress ka dei namar ka jingkynnoh ba ma u kum u President ka MPCC um biang, u Bah Pala u la ong ba hadien ka ilekshon MLA 2023 u la pynpaw hakhmat ki nongïalam ka seng ha Delhi ban pyllait noh kum u President hynrei kim pdiang.
“Ki la ong ïa nga ba nga dei ban bteng, ym ban pyndep ne kynran dien, bad hadien ka ilekshon MP ruh nga la pynpaw ha ryngkat ka kynhun ba lehse kan bha ba pyllait noh kum u President hynrei na Delhi kim pdiang,” la ong u Bah Pala, haba pynshai ba ym don ki MLA kiba phet na ka Congress ki ban ong ba ki phet na daw ba long President ma u.
Haba kren shaphang ka jingshah thied ki MLA kiba la jop na ka Congress, u Bah Pala u la ong ba 15 snem u la don ha Delhi bad u la ïohi kumno ki briew na rithor jong ka India ki peit ïa ki nongmihkhmat paidbah kiba dei na ka Thaiñ Shatei Lam Mihngi, ha kaba ki ju kdew ba tang shu kylla ka Sorkar ha Delhi, ki Sorkar Jylla ruh ki kylla noh la ka dei ha Arunachal Pradesh ne Assam, ne Nagaland, Meghalaya bad kiwei.
“Ka jingpyrkhat ki briew ha Delhi lehse ki briew kiba don ha ka saiñ hima sima kiba na North East ki dei kiba lah ban shah thied. Namarkata, nga dei ban long ka nuksa ba lada nga tlot ne khlaiñ ym dei ban shah thied. Kito kiba shah thied, ngeit ïa nga ha kawei ka sngi kin sa shah thad madan. Katba dang don ka BJP ha ka Sorkar kin pyrshang ban da rapjot, hynrei tang shu duh Sorkar phin sa ïohi ha kata ka por mano ba khlaiñ mano ba tlot. Kumta nga shim ïalade ba nga long uba khlaiñ namar nga khlem shah thied. Nga la shem ruh bun ki seng kiba ong ïa nga ban ïasoh bad ki hynrei ngam liat namar ki paidbah ki khlaiñ bad bun kiba ju ong ïa nga ba dei ban long khlaiñ namar kane ka dei ka thma hapdeng kiba shah thied bad kito kiba shu shah pyndonkam ha kiwei pat,” la ong u Bah Pala.
