Shillong, Nailar 22
U Myntri ka tnat ïalehkai ka Sorkar Jylla u Bah Shakliar Warjri u la pynpaw biang sa shisien ba ka thong bad ka jingthmu jong ka sorkar MDA 2 ka long ban pynkhie im biang ïa ka Mission Football 2.0 ha kaba yn pynkhlain biang sa shisien ïa baroh ki shlem ai jinghikai (academy) ban ai jinghikai ïa ka phutbol bad ha ka juh ka por ban da don lang artad bad ki nonghikai (coach) kiba tbit ki ban pynïaid ïa kane ka jingïalehkai.
Haba pynpaw ha ki lad pathai khubor ha ka sngi Balang, u Bah Shakliar u la pynpaw ruh ba kaei kaba la thrang bad angnud ha kane ka sien jam kaba mynta pat ruh ka long ban shem bad ïohi ba kane ka Mission Football 2 ba ki khynnah ïalehkai ruh kin kiew, da kaba u la ai nuksa haba phaidien sha ka Mission Football 1 ruh la lah ban sei ïa ki nongïalehkai kiba la pawnam kiba la lah ban kynjoh ïa ka kyrdan ïalehkai shaduh ka national level kum ka Bonifilia Shullai, kaba san lyngba ka Mission Football 1 haduh ba kan da phrang ïa la ka jingim ban ïalehkai tad haduh ban da ïoh ban mihkhmat ïa ka ri India ha ka U-16, kumjuh u Givenson Suting bad u Samwan A. Lato kiba la soi ïa ki da ka Bengaluru FC ha ka shlem ai jinghikai ki jong ki nalor ka Sanfida Nongrum bad ka Fragrancy Riwan
U Bah Shakliar u la ïathuh ruh ba ïa mynta la shong pyrkhat na ka bynta ban phah ‘refresher course’ biang ïa ki coach khnang ba kin ïoh ban lah ban nang shem ïa ka jingnang ka jingtip ïa ki jingkylla kiba la mih paw na kawei ka por sha kawei pat.
Ka Mission Football 2.0 kan phaikhmat lem ruh sha ki klob ha ki shnong bapher bapher kaba hangne ka tnat ka la buh ruh ïa ka thong ba kan ïarap ïa ki klob bad ban bteng ruh ïa ka jingïarap sha ki ‘elite club’ ne ki klob na kane ka jylla, kiba ka thong ïalehkai ka jong ki ka dei kaba la kynjoh sha ka kyrdan ban ïakhun ïa ki lympung ïalehkai kiba heh ha ka ri kum ha ka I- League bad ISL.
