Jowai, Nailar 22
Ka Shilliang Raij ka la khur ïa ka jingjop, katba ka Mukhla Umlangshor bad Nangbah Sports Association (NSA) ki la pynïakhaid ha ka lympung ïalehkai Second Division Football Tournament-7th Debo Shullai Memorial Trophy ba la pynïaid da ka West Jaiñtia District Sports Association (WJDSA) ha ka sngi Palei.
Ha kane ka jingïakhun kaba la long ha madan Kiang Nangbah Stadium, Jowai, ka Shilliang Raij ka la pynliem noh ïa ka Maitchaphrang Mowtyrshiah lyngba ka shi kol ba la thep da u Hamewan Rngad haka minit kaba 5.
Haba phai sha kawei pat ka jingïalehkai kaba la long kham hashwa hapdeng ka Mukhla Umlangshor pyrshah ïa ka Nangbah Sports Association (NSA) ki la kut ha ka jingïakhaid mar 3-3 kol. Ïa ki kol na ka bynta ka Mukhla Umlangshor la thep da u Khel Sumer ha ka minit kaba 15, Samuel Shylla (61) bad Ryngkatlang Sumer (81). Katba na ka liang ka NSA la thep da u Teibha Lyngdoh ha ka minit kaba 26, Jubab Pohleng (29) bad Phidalin Dkhar (73).
Kane ka lympung kan bteng biang ha ka 28 tarik mynta u bnai ha kaba ka Shangpung Moosyiem kan ïakhun pyrshah ïa ka Panaliar ha ka por 12 baje mynsngi, katba ka Lumpariat ïa ka Lion Sports &Youth Affair ha ka por 2 baje nohphai sngi.
