Shillong, Nailar 22
Ka lympung ialehkai 30th Inter School and 12th Inter College Karate Tournament 2024 ba la pynïaid da ka All Meghalaya Karate Do Association (AMKA) ka la sdang ha ka sngi Palei ha Indoor Training Hall jong ka SAI Training Center, Shillong.
Ha kane ka lympung la wan ïashim bynta da 509 ngut ki khynnah na ki 95 tylli ki skul bad 25 ngut ki samla pule na ki 7 tylli ki kolej.
Ïa kane ka lympung la plie da ka Secretary ka tnat ïalehkai ka Sorkar Jylla ka Kong Isawanda Laloo kum ka kongsan ha ryngkat ka jingïadon lang u Working President ka Meghalaya State Olympic Association (MSOA) u Bah John F. Kharshiïng kum u symbud kongsan, kumjuh u General Secretary Bah Finely Pariat ha ryngkat ki dkhot nongkitkam katei ka synjuk, ki kmie ki kpa lem bad ki khynnah.
Ha kane ka sngi sdang ki heprit ki la pynshohbiej ïa ki paidbah nongpeitkai lyngba ki sap ki jong ki ha kane ka jingïalehkai karate bad la khmih lynti ba kin nangsan ha kane ka kam ïalehkai bad ruh ba kin long kum ki khkur ïalehkai ha ka kawei ka ban wan.
Haba ai jingkren ha kane ka sngi, ka Kong Isawanda ka la pynpaw ka jingïaroh ïa ka jinglah ban pyntyllun ka AMKA ïa ki lympung ïalehkai manla u snem naduh ba ka la sdang nyngkong eh ha u snem 1992.
“Ngi sngewkmen eh ba ka AMKA ka la lah ban sei haduh 27 ngut ki nongïalehkai ha ki lympng ïalehkai shabar ri. Ka la leit shim bynta ar ngut sha ka Asian Games, iwei ha ka Junior World Championship. Ka la khur kawei ka takma ha ka South Asian Games bad palat 200 tylli ki takma ha ki lympung ïalehkai kiba la pynlong hapoh ri India.”
“Ngi ïohi ïa ki khynnah kiba dang hapoh ka rta kaba 6-7 snem ki wan ïashim bynta bad kane ka lympung ka long kum ka rynsan ba kin pyni ïa ki sap ïalehkai ba kyrpang jong ki ha kane ka jingïalehkai bad ruh ban saindur ïa ki khnang ba ki long kiba phyrnai ha ka lawei ka wan,” ka la bynrap.
“Lyngba ka jingïatrei shitom lang da baroh ngin sa lah ban nangsei kham bun shuh shuh ki khynnah ki ban khur takma ha ki lympung ïalehkai (national), Asian Championship bad wat haduh ka Olympic ha ki sngi ki ban wan.”
Ïa kane ka lympung kaba la kyrshan da ka tnat ïalehkai jong ka Sorkar Jylla, yn pynkut ha ka 24 tarik u Nailar 2024.
