Shillong, Nailar 22
Ka Nongjri Presbyterian Secondary School ka la nangjan sha ka quarter final ha ka lympung ïalehkai 63rd Subroto Cup International Football Tournament 2024, hadien ba ka lah ban pynjem khnap haduh 7-0 kol ïa ka International School Sports Organisation (ISSO) ha ka sngi Palei.
U Chandip Chitri u la khur ïa ka hat-trick da kaba thep marwei haduh 4 kol, katba ïa kiwei pat la pynbud da u Banteilang Malieh, Shanbok Basaïa-moit bad u Ïasynrop Syiemlieh na ka bynta ban pynlong ïa kane ka kynhun ïalehkai Under-15 na Ri Bhoi ban lamkhmat ha ka Group-B da kaba kamai 9 point na ki lai sien ïakhun.
Te kumta kane ka kynhun ka dangkam ban ïakhun tyngeh ha ka jingïalehka kaba khatduh pyrshah ïa ka Dadar and Nagar Haveli and Daman and Diu (DD&DHH) ka ban long mynta ka sngi Thohdieng ha ka por 10:30 mynstep.
Kumba ka paw ka Nongjri Presbyterian ka lah ban pynliem ïa ka kynhun ïalehkai kaba na Sri Lanka da shiteng dorjon (6-0 kol) bad hadien ka la jop da ka walk over ïa ka kynhun ïalehkai kaba na Madhya Pradesh, ka la shah weng noh na ka daw ba ka la pynmih da ki khynnah ïalehkai kiba palat ïa ka rta ba la buh.
